Zaj nyeem hnub tim 16 lub 5 hlis 2023 (Daily reflection)

ZAJ NYEEM HNUB TIM 16 LUB 5 HLIS, HNUB PEB LUB LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 16: 5-11)

Kwv tij Hmoob, Huab Tais Yes Xus paub tias tshuav ob peb teev xwb, mas luag uav tuaj ntes nws thiab tag kis yav hnub qaij mas nws yuav tuag, nws yuav rov tau mus cuag Leej Txiv, ces Huab Tais Yes Xus thiaj hais rau cov thwj tim xws li thaum peb yuav ncaim peb tej phooj ywg mus rau lwm qhov tias “Nyem no kuv mus cuag tus xa kuv tuaj, ces nej yuav tu siab vim kuv tau hais li ntawd rau nej.”
Kwv tij, thaum peb ib tug tseem phooj ywg niaj hnub nrog peb nyob, nws yuav rov mus tsev mas peb yeej tu siab kawg tiag, tab sis yog nws rov mus tsev mas yeej yuav zoo dua.
Huab Tais Yes Xus yeej paub zoo li ntawd, thiab cov thwj tim los yeej paub li ntawd thiab.
Tiam sis Huab Tais Yes Xus mus cuag Leej Txiv, mas tsis yog nws yuav mus ploj ntais, Huab Tais Yes Xus mus, mas Leej Txiv thiaj yuav xa Leej Nplij Neeg uas yog Leej Ntuj Plig Ntshiab tuaj rau saum sawv daws, mas qhov no thiaj yuav zoo rau cov thwj tim thiab rau tas lub qab ntuj neeg.
Huab Tais Yes Xus nyob hauv lub ntiaj teb no mas nws nyob hauv neeg lub cev nqaij, ces Huab Tais Yes Xus yuav ua tsis tau tas txhua yam thiab ua hwj huam tsis tau rau txhua tham tsam los txhua lub sij hawm. Piv txwv li Huab Tais Yes Xus ua tib neeg nyob rau His Xas Lais teb, nws yuav yaj ntshis los tawm tuaj nyob rau hauv peb Hmoob tej zej zos tsis tau, Huab Tais Yes Xus ua neej nyob ob txhiab xyoo dhau los, nws yuav yaj ntshis tawm tuaj nyob hauv lub zim txwv no tsis tau. Tab sis yog vim Huab Tais Yes Xus mus cuag Huab Tais Leej Txiv, ces Leej Ntuj Plig Ntshiab thiaj nqes los, Leej Ntuj Plig Ntshiab yog lub tswv yim, nws yuav mus qhov twg, lub zim txwv twg los lub sij hawm twg, yuav nyob saum tus neeg twg los yeej tau. Yog li Huab Tais Yes Xus thiaj hais rau lawv tias “Cia kuv mus mas yuav zoo dua rau nej.”
Kwv tij Hmoob, Leej Ntuj Plig Ntshiab yog tus Tswv Ntuj qhia peb kom pom qhov txhaum, qhov ncaj, thiab kev txiav txim tias qhov txhaum yog tsis ntseeg txog Yes Xus, qhov ncaj yog Huab Tais Yes Xus mus cuag Leej Txiv ces neeg thiaj tsis pom Huab Tais Yes Xus ntxiv lawm, kev txiav txim yog tus dab Xas Tas tswj lub qab ntuj neeg raug txim lawm.
Yog li mas cov kwv tij, niaj hnub peb yuav thov Huab Tais Leej Txiv xa Leej Ntuj Plig Ntshiab tuaj qhia qhov pom kev rau peb kom peb txawj nyiam qhov ncaj mog.
Nyob zoo sawv daws.