COV PAS DEJ TAUV UA KOM NIAM DEJ NAJ KHOOM NQHUAB

Hais txog teeb meem ntawm tus niam dej Naj Khoom, mas tseem kub ntxhov yam tsis tu ncua. Tus niam dej Naj Khoom muaj ntau ntu dej uas nqhuab yuav tag lawm. Ua rau tsoom pej xeem nyob raws tus niam dej kub ntxhov thiab kuj ua teeb meem rau lwm tus dej. Cov kws txuj coob leej hais tias : hais txog teeb meem ntawm tus niam dej Naj Khoom qhuav, mas yog pheej qhuav li no ntxiv mus, yuav ua teeb meem loj rau fab kev cog txhiam laj txhiam xws noj yav tom ntej.
Xyoo no yog ib xyoo uas tus niam dej Naj Khoom nqhuab me tshaj txhia xyoo, thiab tus niam dej Naj Khoom kuj ntshiab dua txhia xyoo thiab. Cov dej ntshiab hloov ua tsos xiav thiab ua rau cov pej xeem ntes ntses nyob hauv tus niam dej poob siab tias : ntshe nws yuav yog ib xyoos uas tus dej Naj Khoom yuav nqhuab thiab yuav ua teeb meem kub ntxhov rau tsoom pej xeem.
Txij tsaib no nrab xyoo los, mas tus niam dej Naj Khoom pib nqhuab tau yam txawv kawg, ua rau tus dej Naj Khoom tsis phwj mus nyab lwm tus dej li txhia xyoo lawm. Pom tias qhov no yog qhov txawv txav ntawm tus niam dej Naj Khoom. Cov ntses hauv tus niam dej Naj Khoom kuj tsis muaj chaw mus nteg qe rau lwm tus dej, ces zoo li ntses yuav tsawg zuj zus. Tsoom pej xeem uas lawv ua lub neej nyob raws tus niam dej Naj Khoom kuj yuav tsis muaj ntses ntes li txhia xyoo lawm thiab. Tam sim no muaj cov pej xeem coob leej tau yuav ntses coj mus tso rau hauv dej Naj Khoom, tab sis qhov tso ntses ntawd tsuas yog pab tau me me xwb. Vim li ntawd, tsoom pej xeem nyob hauv cov teb chaws npuas dej Naj Khoom thiaj thov kom cov tseem hwv tso tseg kev tauv pas dej nyob hauv tus niam dej Naj Khoom. Thiab thov kom sawv daws sib pab txuag tus niam dej, kom thiaj li yuav muaj dej yug tej xyoob ntoo uas nyob ze tus niam dej Naj Khoom ntxiv mus lawm yav tom ntej. Tsoom pej xeem thiaj li muaj dej los cog txhiam laj txhiam xws thiab muaj ntses rau lawv ntes yug siav.

Tus txhais : Lis Maib, Zoo Tswv Zov Yaj