Zaj nyeem hnub tim 31 lub 5 hlis 2023 (Daily reflection)

ZAJ NYEEM HNUB TIM 31 LUB 5 HLIS, HNUB UA HMOOV MAB LIAB TUAJ XYUAS ES LIS XAS NPES
COV LUS NYOB HAUV LUS KAS NTAWV MOO ZOO (LK 1: 39-56)

Cov kwv tij, hnub no yog hnub peb ua hmoov Mab Liab mus xyuas tus phauj Es Lis Xas Npes. 
Thaum Mab Liab zoo siab txais Leej Tub los xeeb rau hauv nws lub cev lawm, thiab Mab Liab hnov tus Tshiab hais tias tus phauj Es Lis Xas Npes hnub nyoog ntau lawd tab tom xeeb tub thiab, mas Mab Liab rau siab ntso mus tsob hwb nws tus phauj. Mab Liab tu tus phauj mus txog hnub tus phauj yug tus me nyuam thiab tis npe rau tus me nyuam tas, Mab Liab mam rov los tsev.
Leej Ntuj Plig Ntshiab nyob puv hauv tus phauj ces tus phauj thiaj paub tias nws tu ntxhais Mab Liab kuj tab tom xeeb Tswv Ntuj Leej Tub nyob hauv lub cev thiab, ces tus phauj thiaj hais rau nws tus ntxhais Mab Liab tias “Mab Liab, koj yog tus poj niam tau koob tau hmoov tshaj sawv daws, lub txiv txi hauv koj lub cev kuj tau koob tau hmoov. Tsis li ntawd, koj tseem tuaj xyuas kuv thiab.”
Es Lis Xas Npes hais ntxiv tias “Koj saib mas, thaum kuv hnov dheev koj lub suab, mas tus me nyuam hauv kuv lub plab dhia zoo siab kawg li.”
Kwv tij, peb rov muab tig los xav txog ntawm peb, thaum peb hnov txog Huab Tais Yes Xus, peb puas yuav zoo siab. Peb puas pom tias Huab Tais Yes Xus nyob hauv peb thiab nyob hauv cov neeg ib puag ncig peb li Es Lis Xas Npes tau pom.
Ib qho ntxiv, peb pom tias Mab Liab los nws kuj xeeb tub thiab, tab sis nws rau siab ntso mus pab tu nws tus phauj; nws paub tias tus yuav yug los yog Tswv Ntuj Leej Tub, tsis kav nws txaus siab ua tus neeg me tsis muab hlob.
Cov poj niam xeeb tub ib txog peb hlis mas lawv qaug qav, lub cev nkees tsis muaj zog, xav pw xav nyob twj ywm xwb, tiam sis Mab Liab saib txoj kev hlub luag tej luaj dua, nws thiaj mus tu tus phauj kom txog hnub yug tus me nyuam.
Yam no yog ib yam peb yuav tau coj los xav, nyob zoo sawv daws.