Zaj nyeem hnub tim 3 lub 6 hlis 2023 (Daily reflection)

ZAJ NYEEM HNUB TIM 3 LUB 6 HLI, HNUB NCO TXOG LEEJ NTSHIAB SAS LIS VOOS NYAS THIAB COV PHOOJ YWG
COV LUS NYOB HAUV MAS KOS NTAWV MOO ZOO (MK 11: 27-33)

Kwv tij, muaj ib lo lus hais ‘lo lus teb zoo tshaj plaws yog tsis txhob teb luag tej lo lus nug’. Lo lus no yeej yog tiag vim thaum luag tej nug tej yam kom peb tag tswv yim los yog teb yuam kev es luag thiaj yuav nrhiav cai rau peb, mas peb nyob ntsiag ntsiag tsis teb yeej yuav zoo dua. Tab sis hnub no Huab Tais Yes Xus tsis yog tsis teb xwb, Huab Tais Yes Xus paub tias yog nws tsis teb cov thawj leej choj, cov kws ntawv ntshiab, thiab cov txwj laus cov lus, mas ntshai yuav tsis tas. Huab Tais Yes Xus tsis teb lawv, tab sis nws yuav hais ib lo lus rov nug lawv kom lawv tsis txhob teb tau thiab, Huab Tais Yes Xus thiaj hais rau lawv tias “Kuv kuj yuav nug nej ib lo thiab, nej teb kuv ces kuv mam li qhia nej tias kuv tau cai ntawm leej twg los ua tej ntawd.” Yes Xus nug tias “Zam lub cim ntxuav tuaj ntawm Ntuj tuaj, los tuaj ntawm neeg tuaj?” (MK 11: 29-30).
Huab Tais Yes Xus lo lus no ua rau lawv tsis kam teb, vim lawv paub tias teb li cas los kawg yuav tshwm teeb meem xwb, lawv thiaj hais tias lawv tsis paub.
Kwv tij, lub lis piam no yog lis piam Leej Ntuj Plig Ntshiab nqes los, mas peb cov neeg ntseeg txog Yes Xus kuj yuav thov Tswv Ntuj xa Leej Ntuj Plig Ntshiab tuaj qhia lub tswv yim rau peb kom peb txawj ua tus neeg thoob tsib tsis txhob poob rau neeg cov lus haub lus ntxias, rau neeg rooj ntxiab cuab peb, kom peb txawj hais lus rau lwm tus.
Kwv tij, peb yuav ua li Xis Las cov xeeb ntxwv tau sau tseg nyob hauv phau ntawv Npes Xis Las tias “Kuv yeej tab meeg nrhiav kev thoob tsib nyob hauv txoj kev teev Ntuj, kuv tau txais kev txawj kev ntse, kuv nyiam kev thoob tsib, kuv yuav nrhiav kev thoob tsib mus txog kuv hnub kawg (NXL 51: 13-14).
Nyob zoo sawv daws.