Hnub Chiv Tim 28 Lub 5 Hlis 2023 (Sunday Homily)

Hnub Chiv Tim 28 lub 5 Hlis Ntuj 2023
Hnub nyoog Leej Ntuj Plig nqes los
Zam 20: 19-23
“Nej nyob kaj lug! Kuv xa nej mus xws li Leej Txiv xa kuv tuaj.”
Nyob zoo…

Hnub chiv no yog hnub nyoog Leej Ntuj Plig nqes los. Lub caij Hla tas lawm. Peb pib lub caij tshiab, yog tias lub caij Nruab Xyoo.
Yes Xus hais tias “Nej nyob kaj lug,” ces nws tshuab pa rau saum cov thwj tim. Nws hais tias “Nej txais Leej Tswv Yim Ntshiab.” Leej Tswv Yim los Leej Ntuj Plig yog leej twg? 
Leej Ntuj Plig los Leej Tswv Yim Ntshiab yog Tswv Ntuj. Cov neeg ntseeg Kas Tos Liv los Catholic ntseeg txog Peb Leeg Huab Tais: Tswv Ntuj los Leej Txiv, Leej Tub los Huab Tais Yes Xus, thiab Leej Ntuj Plig los Leej Tswv Yim Ntshiab. Kuv yuav qhia txog Leej Ntuj Plig xwb.
Huav Ntawv Ntshiab muaj ntau lub cim qhia txog Leej Ntuj Plig. Muaj piv txwv ib yam li pa, nplaim taws, thiab Leej Ntuj Plig nqes los xws li ib tug nquab.
Cov neeg Israel ntseeg tias pa yog tseem ceeb tshaj plaws, vim txoj pa yog tib neeg txoj sia. Pa yog tib neeg ntsuj plig. Thaum peb pa tas lawm, peb txoj sia kuj yuav tas lawm thiab. Huab Tais Yes Xus tshuab pa rau saum cov thwj tim thiaj yog lub cim hais tias nyem no yav tom ntej Yes Xus ntsuj plig los Tswv Ntuj Ntsuj Plig yuav nyob saum cov thwj tim. Nws tsis tso lawv pov tseg.
Huab Tais Yes Xus hais tias “Nej nyob kaj lug! Kuv xa nej mus xws li Leej Txiv xa kuv tuaj.” Nws  hais li no ua rau peb paub tias tus xa peb mus tshaj Ntuj lus yog Leej Txiv Tswv Ntuj. Vim li ntawd, cov tub ntxhais tshaj Ntuj lus yuav tsum muaj kev kaj lug hauv peb lub siab hauv peb lub tswv yim. Vim li cas? Kuj vim rau qhov hais tias Huab Tais Yes Xus muab kev kaj lug rau peb lawm, nyem no, nws thov kom peb coj mus rau lwm tus, cov tseem tsis paub Yes Xus, cov tseem tsis ntseeg txog Tswv Ntuj. Yog peb tshaj Ntuj lus, tab sis, hauv yus ntsej muag tsis muaj kev kaj lug, hauv yus lub tswv yim tsis muaj kev kaj lug, hauv yus lo lus kuj tsis muaj kev kaj lug, leej twg yuav ntseeg txog Tswv Ntuj lo lus peb tab tom tshaj, puas yog? Vim li ntawd, kev kaj lug los kev kaj siab lug yuav tsum tshwm sim hauv yus lub neej ua ntej yus tshaj tawm rau lwm tus.
Peb yuav tsum vam khom txog Leej Ntuj Plig Ntshiab, xws li Yes Xus twb hais: Nws yuav qhia peb cov neeg tseeg kom peb to taub kev ntseeg thiab peb lub neej hauv niaj teb no. tsis yong yim uas peb los ntseeg txog Tswv Ntuj thiab ua raws li Ntuj cov lus qhia. Ua li ntawd, peb yuav tsum thov Ntuj pab peb, thov Leej Ntuj Plig qhia kom peb to taub Tswv Ntuj thiab nsteeg Tswv Ntuj tiag tiag, tsis tso Ntuj tseg.

Thov Leej Ntuj Plig qhia peb thiab ua kom peb lub siab lub ntsws muaj kev kub siab nhriav thiab ntseeg txog Tswv Ntuj.