Zaj nyeem hnub tim 5 lub 6 hlis 2023 (Daily reflection)

ZAJ NYEEM HNUB TIM 5 LUB 6 HLIS, HNUB NCO TXOG LEEJ NTSHIAB NPOS NIS FAS
COV LUS NYOB HAUV MAS KOS NTAWV MOO ZOO (MK 12: 1-12)

Cov kwv tij, lub Moo Zoo hnub no yog ib zaj paj lug Huab Tais Yes Xus hais txog cov txwj laus thiab cov Fas Lis Xais tsis mloog Tswv Ntuj. Lub vaj txiv cawv yog tam tsoom pej xeem His Xas Lais, cov tub zog saib lub vaj yog cov txwj laus thiab cov Fas Lis Xais uas Tswv Ntuj tsa lawv los coj tsoom His Xas Lais, cov tub txib tam Tswv Ntuj cov Yaj Saub, tus tswv vaj txiv cawv tus tub ces yog Huab Tais Yes Xus.
Kwv tij, Tswv Ntuj xa ntau tus Yaj Saub tuaj ntuas tsoom His Xas Lais kom hloov siab tshiab, tsis kav lawv tsis mloog, lawv tseem muab cov Yaj Saub tua pov tseg thiab. Thaum kawg Tswv Ntuj thiaj xa nws Leej Tub twm zeej tuaj, saib cov thawj coj His Xas Lais puas yuav mloog, tiam sis lawv kuj tsis mloog, lawv tseem nrhiav tswv yim muab Tswv Ntuj Leej Tub tua xws li thaud lawv cov yawg koob tau ua rau cov Yaj Saub.
Kwv tij Hmoob, peb hnov lub Moo Zoo no lawm, peb xav li cas?
Peb puas yuav ua siab phem li cov tub zog saib lub vaj, peb puas ua siab txhav li cov Fas Lis Xais.
Huab Tais Yes Xus hais ntxiv tias “Tus tswv teb yuav tuaj muab cov zov teb tua.” (MK 12: 9)
Kwv tij, peb txhob ua li cov zov lub vaj txiv cawv mog, mas txog hnub kawg peb thiaj yuav tsis raug xyeeb rau dab phem cov hluav taws. 
Nyob zoo sawv daws.