Zaj nyeem hnub tim 6 lub 6 hlis 2023 (Daily reflection)

ZAJ NYEEM HNUB TIM 6 LUB 6 HLIS, HNUB NCO TXOG LEEJ NTSHIAB NOS NPAWS
COV LUS NYOB HAUV MAS KOS NTAWV MOO ZOO (MK 12: 13-17)

Kwv tij Hmoob, lub Moo Zoo hnub no qhia peb kom paub txog Huab Tais Yes Xus tias Huab Tais Yes Xus yog ib tus neeg hais qhov tseeb, tsis tsa leej twg cai, thiab yog tus qhia Tswv Ntuj txoj kev raws qhov tseeb.
Yog li mas peb cov raws Huab Tais Yes Xus qab thiaj tsim nyog yoog raws Huab Tais Yes Xus tus yam ntxwv no.
Dua ntawd, hnub no Huab Tais Yes Xus tseem qhia peb tias txhob muab Tswv Ntuj txoj kev los xyaw nrog ntiaj teb txoj kev. Yam twg yog Tswv Ntuj li, peb yuav tsum muab rau Tswv Ntuj; yam twg yog ntiaj teb li, peb tsum muab rau ntiaj teb. Piv txwv li peb ua neej nyob lub teb chaws twg mas peb yuav tau yoog raws lub teb chaws ntawd txoj cai lij choj, tsis tsim kev kub ntxhov rau lub teb chaws.
Nyob zoo sawv daws.