Zaj nyeem hnub tim7 lub 6 hlis 2023 (Daily reflection)

ZAJ NYEEM HNUB TIM 7 LUB 6 HLIS, HNUB PLAUB LUB LIS PIAM 9 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 12: 18-27)

Kwv tij Hmoob, neeg feem coob mas tsis ntseeg tias muaj ib hnub tus neeg tuag yuav sawv rov los tau. Nyob hauv cov His Xas Lais muaj ib pab kuj ntseeg li no thiab, cov ntawd yog cov Xas Dus Kais. Lawv xav paub tias yog neeg tuag sawv rov los tau tiag, mas yog ib tug poj niam nws muaj 7 tus txiv, thaum nws thiab cov txiv sawv rov los lawm, nws yuav yog tus txiv neej twg tus poj niam.
Kwv tij, nyob hauv peb mas tej zaus peb yuav xav li cov Xas Dus Kais hais, peb yuav xav tias thaum peb sawv rov qab los, peb tus txij nkawm puas tseem yog peb tus tav li thaud tseem ua neej nyob ntiaj teb no.
Kwv tij, Huab Tais Yes Xus hais rau cov neeg xav li ntawd tias “Thaum neeg lub cev sawv rov los, neeg yuav zoo li cov Tshiab nyob saum ntuj”, txhais tias thaum ntawd sawv daws yuav tsis muaj lub siab ntshaw ua txij nkawm, ua niam ua txiv lawm, tiam sis sawv daws tsuas muaj lub siab zoo siab tsob hwb Tswv Ntuj tas mus li lawm xwb.
Yog li mas kwv tij Hmoob, thaum peb tseem ua neej nyob, peb yuav sis nyiam sis hlub, ib tug yuav zam rau ib tug mog.
Nyob zoo sawv daws.