Zaj nyeem hnub tim 9 lub 6 hlis 2023 (Daily reflection)

ZAJ NYEEM HNUB TIM 9 LUB 6 HLIS, HNUB NCO TXOG LEEJ NTSHIAB ES FES LEM
COV LUS NYOB HAUV MAS KOS NTAWV MOO ZOO (MK 12: 35-37)

Kwv tij Hmoob sawv daws, Huab Tais Yes Xus hais tias “Vim li cas cov Kws Ntawv Ntshiab thiaj hais tias ‘Leej Pleev’ yog Das Vis tub, vim Das Vis twb hu Leej Pleev ua ‘Huab Tais’?
Kwv tij, lo lus ‘Leej Pleev’ los yog lus Aas Kiv tias ‘Christ’ ntxeev los ntawm lo lus As Las Mais tias ‘Mes Xias’ txhais tias ‘tau txais cov roj pleev’, yog hais txog tus yuav tau ua vaj kav Das Vis lub theej kiab. Yog vim li ntawd cov Kws Ntawv Ntshiab thiaj hais tias ‘Leej Pleev’ yog Das Vis leej tub.
Kwv tij, tus vaj Das Vis tsis tau hais tias ‘Leej Pleev’ yog nws tus tub, tiam sis nws hais tias ‘Leej Pleev’ yog nws tus ‘Huab Tais’, yog tus tuaj ntawm Tswv Ntuj tuaj, yog tus cawm tsoom His Xas Lais hauv txoj kev tuag.
Hnub no, Huab Tais Yes Xus thiaj hais tias nws tsis yog tus vaj Das Vis roj ntsha xwb, nws tseem yog tus Tswv Ntuj xa tuaj thiab, nws yog tus muaj Leej Ntuj Plig pleev, muaj Leej Ntuj Plig qhwv thiab ntxaum nws. Huab Tais Yes Xus yog tseem tib neeg thiab tseem Tswv Ntuj, yog Tswv Ntuj haiv neeg tus Huab Tais.
Li ntawd, niaj hnub no Yes Xus Pleev thiaj yog peb tsoom neeg ntseeg tus Huab Tais. Peb thiaj vam txog peb tus Huab Tais Yes Xus pab thov Leej Txiv Tswv Ntuj pub rau peb, thiab peb thiaj muaj kev vam khom nyob hauv peb tus Huab Tais Yes Xus Pleev.
Nyob zoo sawv daws.