Caritas International xaiv Tswv Qhia Kikuchi ua tus thawj coj tshiab

Nyob hauv lub rooj sab laj loj zaum 22, txij hnub tim 11 txog tim 16 lub 5 hlis nyob Los Mas. Hnub tim 13 lub 5 hlis no, lawv thiaj xaiv Tswv Qhia Kikuchi ua tus thawj coj tshiab.

Tswv Qhia Kikuchi yug nyob Iwate, hauv lub xeev nyob ntawm ntug hiav txwv toob fab pej npuas lub pov txwv Honshu, hnub tim 1 lub 11 hlis xyoo 1958.

Lub 3 hlis xyoo 1985, nws cog lus thawj zaug nyob hauv Divine World. Nws txais lub Cim Tiag Tes ua Txiv Plig hnub tim 15 lub 3 hlis xyoo 1986. Tom qab nws ua Txiv Plig lawm, nws mus tshaj Ntuj Lus nyob teb chaws Khas Nas. Nws tau ua Txiv Plig nyob Khas Nas teb 8 xyoo. Nws tau ua tus thawj tswj hauv lub rooj sab laj cov Tswv Qhia Kav Tos Liv nyob Zis Pees teb, thiab ua tus lwm thawj tswj ntawm lub rooj sab laj cov Tswv Qhia As Xias (FABC) uas yog tus thawj coj Caritas Internationalis. 

Nws kuj tseem ua tus thawj tswj ntawm kev pab cov neeg txom nyem, kev txhim kho thiab kev ua hauj lwm rau 162 lub Koom Haum Kav Tos Liv ntev li 4 xyoos. 

Caritas ua cov hauj lwm txhim kho lub ntiaj teb kom zoo tuaj, qhov loj mas yog pab cov neeg tsis muaj lub zoo caij thiab pab cov neeg raug quab yuam uas muaj nyob hauv 200 lub teb chaws thiab lwm qhov. 

Tswv Qhia ua hauj lwm nrog lub Koom Haum Caritas thiab tuav ntau txoj hauj lwm txij xyoo 1995 los. Nws xub pib cov hauj lwm nyob hauv cov yeej thoj nam nyob Npus Khaus thiab nyob Xas Is. Nws ua tus thawj kav xwm Catitas nyob Zis Pees teb xyoo 1999 txog xyoo 2004. Thiab ua tus thawj tswj Caritas Japan xyoo 2007 txog xyoo 2022. Tam sim no nws ua tus thawj coj Caritas Internationalis, ua hauj lwm pab cov neeg xav tau kev pab nyob thoob ntiaj teb.