Ntoo Cuam lub Cim pab peb kom hnov tias Tswv Ntuj puag peb cia

Ntoo Cuam lub Cim tsom kom pom tias Tswv Ntuj nyiam peb npaum cas thiab pab peb nco tias Tswv Ntuj puag peb cia tas li.

Nyob zoo kwv tij Hmoob sawv daws, Hnub Chiv tim 4 lub 6 hli no yog hnub hwm Peb Leeg Huab Tais, yog li Vaj Qhia Fas Ntshis Kus thiaj tau nthuav tias peb pom Peb Leeg Huab Tais thaum peb ua Ntoo Cuam lub Cim. Ntoo Cuam lub Cim yog lub cim qhia rau peb tias Tswv Ntuj nyiam peb npaum li cas.

Ntawv Moo Zoo hnub hwm Peb Leeg Huab Tais xyoo no yog muab hauv Zam Ntawv Moo Zoo los; yog hais txog thaum Yes Xus nrog Nis Kos Des Mos tham. Nis Kos Des Mos yog ib tug Fas Lis Xais hauv lub rooj txwj laus Xas Nes Dees, nws lees tias Yes Xus yog tus xib hwb Tswv Ntuj xa tuaj tiag thiab nws mus nrhiav Yes Xus thaum tsaus ntuj. Yes Xus thiaj hais lo lus no qhia rau Nis Kos Des Mos tias “Tswv Ntuj nyiam lub ntiaj teb tas npaud, nws thiaj tau muab nws Leej Tub rau lub ntiaj teb.”

“Lo lus no Huab Tais Yes Xus hais txog Leej Txiv thiab Leej Txiv kev nyiam loj heev.” Vaj Qhia pib nthuav lub Moo Zoo, “Leej Txiv thiab Leej Tub yog tug duab peb paub zoo txog, yog peb xav txog, mas yuav cuam tshuam rau Tswv Ntuj tus duab peb lub tswv yim mem cia vim peb xav tias Tswv Ntuj yog tus muaj hwj chim loj thiab nyob deb peb. Tab sis Huab Tais Yes Xus qhib lub tswv yim rau peb kom xav txog Tswv Ntuj xws li ntsia daib duab hais txog ib tsev neeg zaum ncig lub rooj mov yog rooj mov txi Ntuj, yog tus qauv cim hais txog Peb Leeg Huab Tais. Yog daim duab qhia peb txog kev sib koom nyob hauv Tswv Ntuj. Leej Txiv, Leej Tub, thiab Leej Ntuj Plig Ntshiab sib koom ua ib tug.”

Vaj Qhia soj ntsuam pom tias Peb Leeg Huab Tais koom ua ib tug Tswv Ntuj tsis yog daim duab xwb, tiam sis yog muaj tiag, vim Leej Txiv hliv Leej Ntuj Plig rau hauv peb nruab siab tau mas yog muaj Huab Tais Yes Xus, ces peb thiaj paub tias Tswv Ntuj nrog peb nyob.

Leej Ntuj Plig Ntshiab ua rau peb zoo li Huab Tais Yes Xus ua rau Nis Kos Des Mos, yog qhia peb kom paub txog qhov tob hauv kev yug dua tshiab thiab Leej Ntuj Plig Ntshiab nthuav Leej Txiv lub siab rau peb, ces peb thiaj muaj feem nyob hauv Tswv Ntuj txoj sia. Peb thiaj hais tau tias yog peb tau koom Tswv Ntuj rooj mov kom tau nrog faib Tswv Ntuj kev nyiam raws li peb tau pom nyob hauv txhua lub Thaj Txi Ntuj ntawm lub thaj uas Huab Tais Yes Xus muab nws txi rau Leej Txiv kom tau txhiv peb.

“Peb nco tej yam no tau li cas? Kuj yog los ntawm tus yeeb yam yooj yim peb tau kawm txij thaum tseem yau yua los: yog Ntoo Cuam lub Cim.” Vaj Qhia hais rau sawv daws, “thaum peb ua Ntoo Cuam lub Cim, peb rov ntuas peb tias Tswv Ntuj nyiam peb npaum cas, Tswv Ntuj thiaj muab nws txoj sia los txhiv peb; thiab peb hais rau peb tias Tswv Ntuj kev nyiam puag peb cia txij saud mus rau hauv, txij sab laug mus rau sab xis, zoo li lub xub pwg khawm peb cia tsis pub plam.”

Tib lub caij no, Vaj Qhia xav kom sawv daws rau siab ntso ua tim khawv txog kev sib nyiam sib hlub, koom ua ib tug nyob hauv Tswv Ntuj lub npe tias “Hnub no, peb muaj peev xwm rov nug peb tias ‘peb puas ua tim khawv txog kev nyiam xws li Tswv Ntuj nyiam peb tau? Los peb puas muab txoj kev nyiam xws li Tswv Ntuj txoj los ua lub tswv yim rau peb?”

Vaj Qhia kuj tau hais txog ntawm sawv daws lub zej zos tias puas yuav ua tim khawv txog kev sis nyiam sis hlub tau tias “Lawv puas paub txog kev sis nyiam? Nyob hauv peb tsev neeg, peb puas txawj sis nyiam sis hlub?”