Hnub Chiv Tim 18 Lub 6 Hlis 2023 (Sunday Homily)

Hnub Chiv Tim 18 Lub 6 Hlis Ntuj 2023

Lub cail Nyob Nruab Xyoo

Mas Tais 9:36-10:8

“Qoob loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob.”

Nyob zoo kwv tij sawv daws, 

Kwv tij zoo nyiam, lub Moo Zoo hnub no qhia kom peb paub tias Huab Tais Yes Xus muab txoj hauj lwm tshaj Ntuj lus rau nws cov thwj tim. Nws hais tias “Qoob loo ntau kawg, tab sis cov tub zog tsawg. Nej thov tus Tswv qoob kom nws xa ib co tub zog tuaj sau nws cov qoob.” Thaum ub, thaum peb hnov Tswv Ntuj lo lus zaj no, peb xav tias cov tub zog yog cov txiv plig, cov Leej Phauj, thiab cov xib hwb tshaj Ntuj lus. Tab sis mas, peb nkag siab li no tsis tshua meej, tsis tshua raug. Cov tub zog txhais tias Yes Xus cov thwj tim uas yog peb sawv daws txhua leej txhua tus. Nco tsoov tias thaum peb txais lub Cim Ntxuav hauv Leej Txiv, Leej Tub thiab Leej Ntuj Plig Ntshiab lub npe, peb yog Yes Xus ib tug thwj tim lawm. Peb txais lub Cim Ntxuav lawm tsis txhais tias peb yog Catholic lawm, peb tsis ua dab tsi lawm. Tsis yog! Tsis yog tiag tiag! Thaum peb yog neeg tseeg txog Yes Xus, peb txais lub Cim Ntxuav, peb tau txais ib txoj hauj lwm tseem ceeb thiab yog tias txoj hauj lwm tshaj Ntuj lub Moo Zoo. Vim li ntawd, txoj hauj lwm tshaj Ntuj lus tsis yog hauj lwm ntawm txiv plig, leej phauj los xib hwb xwb, tab sis yog cov neeg tseeg sawv daws txoj hauj lwm. 

Niaj hnub no, cov tub zog ua hauj lwm tsawg kawg, tsis muaj leej twg xav ua txoj hauj lwm no, vim rau qhov hais tias thaum yus ua Tswv Ntuj txoj hauj lwm tshaj Ntuj Lus, yus yuav tsum qee yus tus kheej los ua. Qee leej hais tias kuv tsis muaj sij hawm los pab ua Tswv Ntuj hauj lwm lawm, kuv muaj hauj lwm ntau yam yuav tsum ua kom tiav. Qee leej hais tias kuv tsis muaj sij hawm los tshaj Tswv Ntuj lo lus thiab muaj teeb meem ntau yam.

Tab sis mas, peb nco puas tau? Tias Tswv Ntuj tsis thov peb ua hauj lwm hnyav hnyav los thov kom peb ua hauj lwm uas peb ua tsis tau. Tswv Ntuj tsuas thov kom peb teev Ntuj rau luag tej, thov Ntuj rau lwm tus nyob ib puag ncig, thov Ntuj rau lub qab Ntuj neeg, thov Ntuj kom yus tus kheej thiab yus tsev neeg muaj txoj kev ntseeg. “Nej thov tus Tswv qoob kom nws xa ib co tub zog tuaj sau nws cov qoob.” Tswv Ntuj tsuas thov kom peb tuaj koom thaj txi Ntuj, txais lub Cim Zam Txim, txais lub Cim Yug. Txoj hauj lwm tshaj Ntuj lus yog kev ua yus lub neeg hauv txoj kev ntseeg, yus ua lub neeg zoo, yus ua Ntuj tsaug, yus teev Ntuj txhua hnub txhua hmo, yus hlub luag tej cov nyob ib puag ncig. Qhov no yog txoj kev ua tim khawv txog Tswv Ntuj kev nyiam kev hlub lawm. Thaum luag tej pom yus, lawv yuav paub tias yus yog Tswv Ntuj cov thwj tim. Thaum lawv saib yus lub neej, lawv yuav paub tias yus yog Tswv Ntuj cov thwj tim. Qhov no kuj yog kev tshaj Ntuj lus thiab. Kev ua tim khawv txog Tswv Ntuj yog Yes Xus cov thwj tim txoj hauj lwm.