Zaj nyeem hnub tim 12 lub 6 hlis 2023 (Daily reflection)

ZAJ NYEEM HNUB TIM 12 LUB 6 HLIS, HNUB OB LUB LIS PIAM 10 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 5: 1-12)

Cov kwv tij, txij lub lis piam 10 mus txog lub lis piam 21 hauv lub caij Nyob Nruab Xyoo, mas Koom Txoos Kav Tos Liv xaiv cov lus hauv Mas Tais Ntawv Moo Zoo coj los rau peb nyeem thiab twm ua ntej yuav pib ua peb txoj hauj lwm. Mas Tais Ntawv Moo Zoo peb yuav tau nyeem, yog hais txog Huab Tais Yes Xus cov lus qhia. Nyob hauv thawj cov lus qhia mas yog cov lus qhia txog ‘cov tau txoj hmoov zoo’, yog cov lus Huab Tais Yes Xus qhia tsoom sid saum roob.

Lo lus ‘txoj hmoov zoo’ yog ntxeev los ntawm lo lus Hes Las tias ‘Makrios’ txhais tias ‘kev zoo siab kawg nkaus’. Yog li nyob hauv zaj ‘cov tau txoj hmoov zoo’ thiaj hais tau tias yog Huab Tais Yes Xus qhia tias ‘tus neeg muaj kev zoo siab kawg nkaus, mas nws yuav ua zoo li cas.’

Kwv tij Hmoob, peb txhua tus neeg puav leej nrhiav kev zoo siab, tiam sis kev zoo siab hauv lub ntiaj teb tsuas nyob ib pliag xwb yuav zaj ntshis, tsis yog kev zoo siab kawg nkaus. Kev zoo siab kawg nkaus mas yog txoj kev zoo siab nyob mus li nyob hauv Tswv Ntuj. Yog li peb yuav txais kev zoo siab kawg nkaus, los yog tau txoj hmoov zoo; mas yog thaum peb rov tau mus nyob hauv Tswv Ntuj xwb.

Yog vim li ntawd, Huab Tais Yes Xus thiaj qhia rau sawv daws tias lawv yuav tau mus nyob nrog Tswv Ntuj, lawv yuav tau txais kev zoo siab kawg nkaus, lawv yuav tau txoj hmoov zoo; mas lawv tsum ‘ua neeg pluag hauv nruab siab, ua siab zoo, ua neeg quaj ntsuag, ua neeg tshaib thiab nqhis txoj kev ncaj, ua neeg muaj lub siab hlub luag tej, ua neeg siab huv, ua neeg nyiam tsim kev thaj yeeb’, thiab Huab Tais Yes Xus qhia ntxiv tias lawv yuav tsum tsis thim tsis nrauj lawv lub siab nyiam kev ncaj thiab ntseeg Yes Xus.

Kwv tij, tus yam ntxwv Huab Tais Yes Xus qhia kom peb coj ntawd, tsis yooj yim tiag tiag. Yog li peb yuav niaj hnub thov Huab Tais Leej Txiv xa Leej Ntuj Plig Ntshiab tuaj kaj peb lub siab, peb lub tswv yim, ntxiv zog rau peb kom txhua txhua hnub peb yoog tau tus yam ntxwv Huab Tais Yes Xus qhia peb ntawd. Peb thiaj yuav tau txoj hmoov zoo, yog txais kev zoo siab kawg nkaus nyob hauv Tswv Ntuj.

Nyob zoo sawv daws.