Zaj nyeem hnub tim 14 lub 6 hlis 2023 (Daily reflection)

ZAJ NYEEM HNUB TIM 14 LUB 6 HLIS, HNUB PLAUB LUB LIS PIAM 10 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 5: 17-19)

Kwv tij Hmoob, Huab Tais Yes Xus hais tias “Nej txhob xav tias kuv tuaj rhuav Txoj Cai thiab cov Yaj Saub. Kuv tsis tuaj rhuav, kuv tuaj qhia ntxiv kom thoob xwb.”

Kwv tij, nyob hauv Koom Txoos liv xwm, peb pom tias yav thaud, sawv daws sib cav tias ‘Thaum peb tig los ntseeg txog Yes Xus lawm, peb puas tseem ua raws Mais Xes txoj cai? Peb puas yuav ua kab ke txiav? Peb puas caiv Hnub Xas Npas Tos? Peb puas yuav caiv cov nqaij tsis huv li cov Yus Das? Peb puas muab tsiaj los tua txi Ntuj li cov Yus Das?’

Los yog nyob hauv peb tsoom Hmoob, peb kuj yuav nug tias ‘Thaum kuv los ua Ntuj kev cai lawm, kuv puas yuav ua neeb tau? Kuv puas yuav noj tau cov nqaij hauv kuv cov kwv tij tsem coj qub kev cai tsev? Kuv puas hlawv nyiaj ntawv rau cov dua nra tau? Kuv puas txi tau kuv cov poj yawm txwv koob?’ Peb yeej muaj ntau yam nug li ntawd.

Kwv tij, Huab Tais Yes Xus hais tias “Kuv tsis tuaj rhuav, tab sis kuv tuaj qhia kom thoob.” Lo lus no tsis yog kom peb coj raws li qhov qub, tiam sis yog kom peb muab saib kom tshab, saib kom zoo tias yam twg tsim nyog pauv hloov kom pab tau peb lub neej mus zoo dua qhov qub, mas peb kuj yuav hloov, tab sis kom peb nco tias tej ntawd yuav tsum haum rau Tswv Ntuj Txoj Cai uas peb hais tias Huab Tais Ntuj 10 Lo Lus Qhia.

Huab Tais Ntuj 10 Lo Lus Qhia yog li no: 1) Koj yuav teev Huab Tais Ntuj ib tug xwb thiab koj yuav nyiam Huab Tais Ntuj tshaj tas puas tsav yam, 2) Koj yuav hwm Huab Tais Ntuj lub npe, 3) Koj yuav caiv Huab Tais Ntuj hnub, 4) Koj yuav hwm koj niam koj txiv, 5) Koj tsis txhob tua neeg, 6) koj tsis txhob zes luag txij luag nkawm, 7) Koj tsis txhob ua tub sab tub nyiag, 8) Koj tsis txhob dag rau luag tej, 9) Koj tsis txhob tso koj lub siab ntshaw zes luag txij luag nkawm, thiab 10) Koj tsis txhob tso koj lub siab ntshaw ua tub sab tub nyiag.

Kwv tij, Huab Tais Yes Xus hais ntxiv tias “Tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.” Yog li mas peb thiaj tsum ‘ua’ thiab ‘qhia’ kom lwm tus ua xws li Huab Tais Ntuj 10 Lo Lus Qhia no.

Nyob zoo sawv daws.