Zaj nyeem hnub tim 15 lub 6 hlis 2023 (Daily reflection)

ZAJ NYEEM HNUB TIM 15 LUB 6 HLIS, HNUB TSIB LUB LIS PIAM 10 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 5: 20-26)

Cov kwv tij,  lub Moo Zoo hnub no yog Huab Tais Yes Xus qhia Txoj Cai kom thoob, Huab Tais Yes Xus muab Huab Tais Ntuj 10 Lo Lus Qhia lus nthuav kom ntxaws rau sawv daws mloog. Huab Tais Yes Xus nthuav 2 lo lus yog ‘nyiam Tswv Ntuj’ thiab ‘nyiam tib neeg’.

Huab Tais Yes Xus hais tias “Yog nej tsis ua siab ncaj, mas nej yuav mus tsis tau hauv Ntuj lub Ceeb Tsheej.”

Kwv tij, tus neeg siab ncaj, yog tus neeg siab tsis nkhaus, yog tus neeg siab dawb siab huv.

Peb yuav ua tau neeg siab ncaj tau li cas? 

Huab Tais Yes Xus qhia peb kom txhob npau taws, txhob chim rau lwm tus neeg. Huab Tais Yes Xus qhia peb kom zam rau lawv, hlub lawv thiab nyiam lawv.

Kwv tij, peb tsum txawj nyiam luag tej, mas peb thiaj yuav nyiam tau Tswv Ntuj raws li tus Hauv Paus Xa Lus Zam cov lus sau mus ntuas tsoom neeg ntseeg tias “Cov zoo nyiam, peb yuav sib nyiam sib hlub mog! Vim txoj kev nyiam tuaj ntawm Tswv Ntuj tuaj, ua li mas tus twg nyiam, tus ntawd yug ntawm Tswv Ntuj los, thiab nws paub Tswv Ntuj. Tus tsis txawj nyiam, mas nws tsis paub Tswv Ntuj. Tus tsis nyiam nws tus kwv uas qhov muag pom tau, mas nws nyiam tsis tau Tswv Ntuj uas nws qhov muag tsis pom” (1Z 4: 7-8, 20).

Kwv tij Hmoob, tus neeg siab ncaj li Huab Tais Yes Xus hais thiaj yog tus muaj lub siab nyiam Tswv Ntuj thiab nyiam tib neeg.

Nyob zoo sawv daws.