Zaj nyeem hnub tim 27 lub 6 hlis 2023 (Daily reflection)

ZAJ NYEEM HNUB TIM 27 LUB 6 HLIS, HNUB NCO TXOG LEEJ NTSHIAB XIS LIS NYOB AS LES XAS NRIAS
COV LUS NYOB HAUV MAS TAIS NTAWV MOO ZOO (MT 7: 6, 12-14)

Kwv tij Hmoob, lub Moo Zoo hnub no yog Huab Tais Yes Xus txhawj txog peb ces nws thiaj ntuas peb tias “Nej txhob muab tej yam ntshiab huv, los tej yam muaj nuj nqes pub rau cov neeg tsis pom txog yam ntawd lub txiaj ntsim. Nej xav kom luag ua zoo li cas rau nej, mas nej tsum xub ua li ntawd rau luag tso. Nej yuav nrhiav kom tau lub qov rooj coj nej mus txais txoj sia.”
Kwv tij, lub txoj kev ntseeg txog Yes Xus yog yam ntshiab huv thiab muaj nqes uas Huab Tais Yes Xus hais txog. Thaum peb nyob hauv cov neeg tsis liam fab ntseeg txog Yes Xus, mas peb txhob hais ntau ntau txog peb kev ntseeg rau lawv, tsam lawv meem txom ces lawv yuav ua phem rau peb. Qhov peb yuav ua thaum nyob hauv cov neeg tsis muaj kev ntseeg, mas yog peb yuav tau ua qhov zoo rau lawv, hlub lawv, nyiam lawv, pab lawv raws li Huab Tais Yes Xus qhia rau peb. Peb ua zoo rau lawv, lawv yuav ua zoo rov rau peb; peb hlub lawv, lawv kuj yuav hlub peb; peb nyiam lawv, lawv yuav nyiam peb thiab; peb pab lawv, ces lawv yuav pab peb thaum peb vam txog lawv. Peb ua li no ces peb thiab lawv yuav muaj kev sib nyiam sisb hlub, sib haum xeeb; yog peb tau coj Tswv Ntuj lub Ceeb Tsheej mus txog lawv ntag.
Thaum peb coj Tswv Ntuj lub Ceeb Tsheej mus cog tau nyob rau hauv lawv siab, mas yog peb tau nrhiav thiab xaiv chaws mus hauv lub qhov rooj nqaim thiab ti lawm tiag, ces thaum ntawd peb kuj yuav tau txais koob haum loj ntawm Tswv Ntuj.
Tab sis mas cov kwv tij Hmoob, qhov peb hais no tsis yooj yim rau peb ua kiag li. vim tias dab phem ntxias neeg yeej yuav sawv los tawm tsam peb, tsis pub peb txhim Tswv Ntuj lub Ceeb Tsheej rau hauv luag tej. Li ntawd, peb yuav raug kev txom nyem loj kawg. Txawm li ntawd los thov kom peb tso siab rau Tswv Ntuj, peb yuav nquag thov Tswv Ntuj ua lub zog rau peb kom txais yeej dab phem txoj kev haub kev ntxias yuav tuaj raug rau peb niaj hnub mog.
Nyob zoo sawv daws.