Zaj nyeem hnub tim 28 lub 6 hlis 2023 (Daily reflection)

ZAJ NYEEM HNUB TIM 28 LUB 6 HLIS, HNUB NCO TXOG LEEJ NTSHIAB IS LIS NES
COV LUS NYOB HAUV MAS TAIS NTAWV MOO ZOO (MT 7: 15-20)

Kwv tij Hmoob, Huab Tais Yes Xus hais tias “Nej ceev faj txog cov yaj saub cuav.” Cov yaj saub cuav yog cov zoo li cas? Huab Tais Yes Xus kuj hais rau peb tias “Cov yaj saub cuav yog cov zoo li tus yaj tab sis lawv yog hma.”
Kwv tij, hnub no peb tsis hais txog cov neeg tshaj Tswv Ntuj Lo Lus, los cov neeg niaj hnub tuaj tshaj txog kev ntseeg rau peb tej zej zos. Tab sis peb yuav rov hais txog peb cov neeg ntseeg. 
Huab Tais Yes Xus hais tias tus twg ntseeg txog nws mas tus ntawd yog nws cov yaj. Peb ntseeg txog Yes Xus tiag, ces peb thiaj yog Yes Xus cov yaj. Tab sis peb soj ntsuam peb saib nyob hauv peb, peb puas yog tus tseem yaj los peb lam hnav daim tawv yaj xwb, sab hauv peb mas yog tus hma.
Huab Tais Yes Xus hais ntxiv tias “Nej ntsia lub txiv lawv txi, nej yuav paub lawv.”
Yog li peb yuav paub tau tias peb yog tseem yaj los yog tus hma, mas yog peb rov ntsia peb lub neej, saib peb txi tau cov txiv zoo los cov txiv phem, peb coj lub neej raws lub Moo Zoo los yog peb coj lub neej raws ntiaj teb tus yam ntxwv.
Kwv tij Hmoob, peb yog tus neeg ntseeg txog Yes Xus, yog Huab Tais Yes Xus cov thwj tim, yog nws pab yaj; mas peb yuav kub siab nyeem Yes Xus lub Moo Zoo, mloog saib niaj hnub Huab Tais Yes Xus hais dab tsi rau peb, Huab Tais Yes Xus xav kom peb coj tus yam ntxwv zoo li cas thiaj yuav phim rau nws lub Moo Zoo.
Kwv tij, peb yuav tsis hais tias nej yuav coj li cas thiaj yuav yog tus tseem yaj. Qhov peb yuav hais mas yog nej yuav nquag nrhiav Huab Tais Yes Xus nej tus Tswv Ntuj thiab npuab nws tsis tseg.
Nyob zoo sawv daws.