Zaj nyeem hnub tim 1 lub 7 hlis 2023 (Daily reflection)

ZAJ NYEEM HNUB TIM 1 LUB 7 HLI, HNUB XYA LUB LIS PIAM 12 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 8: 5-17)

Cov kwv tij Hmoob, cov His Xas Lais saib cov neeg Los Mas thiab cov neeg teev pej kuam cov dab yog cov neeg tsis huv, lawv tsis yog Tswv Ntuj haiv neeg, yog li mas cov His Xas Lais thiaj thuam cov Los Mas thiab tsis fim nrog cov Los Mas, txawm tias thaum ntawd cov Los Mas yuav yog cov nom tswj lub teb chaws. Tiam sis Huab Tais Yes Xus tsis xav li ntawd, txawm tias nws txoj hauj lwm yuav yog xub cawm cov His Xas Lais tso, ces thaum tus xab txheeb tuaj thov nws, nws thiaj zoo siab mus pab tus xab txheeb ntawd tus tub txib.
Ib qho tuaj, mas peb yuav pom tias tus xab txheeb no nws yog ib tug nom tsis kav nws muaj lub siab hlub nws cov tub txib, nws txo nws lub hwj chim los thov ib tug neeg me me mus pab nws tus tub txib.
Yog peb muab piv rau peb, mas peb puas tau thov Tswv Ntuj pub rau lwm tus neeg?
Kwv tij, tus xab txheeb paub tias nws yog ib tug nom, tsuav nws hais xwb mas Yes Xus kawg ua raws li nws hais, tab sis nws tsis ua li, thiab nws kuj tsis xav kom zeej tsoom saib tsis taus Yes Xus, nws thiaj hais tias “Huab Tais, kuv tsis tsim nyog koj chaws los hauv kuv tsev, tsuas yog koj hais ib lo lus xwb ces kuv tus tub txib yuav zoo hlo.”
Tus xab txheeb no puas muaj ib lub siab ntseeg tias Huab Tais Yes Xus yog tus tuaj ntawm Tswv Ntuj tuaj, thiab nws puas tso siab tias Huab Tais Yes Xus muaj hwj huam kho tau nws tus tub txib?
Yog nws tsis ntseeg thiab tsis tso siab mas nws yeej yuav tsis hais cov lus ntawd. Vim li ntawd Huab Tais Yes Xus thiaj qhuas txog tus xab txheeb no lub siab ntseeg.
Kwv tij, lub Koom Txoos kuj xav kom peb muab ib lub siab ntseeg xws li tus xab txheeb no thiab, mas lub Koom Txoos thiaj muab nws lo lus no los cia rau peb hais ntuas peb siab ua ntej peb yuav txais Huab Tais Yes Xus lub Cev tias ‘Huab Tais, kuv tsis tsim nyog txais koj tuaj hauv kuv vaj tsev. Thov koj hais lo mas kuv lub siab yuav zoo hlo.’
Nyob zoo sawv daws.