Zaj nyeem hnub tim 5 lub 7 hlis 2023 (Daily reflection)

ZAJ NYEEM HNUB TIM 5 LUB 7 HLI, HNUB NCO TXOG LEEJ NTSHIAB TUAM NTXAS NKAS LIAS
COV LUS NYOB HAUV MAS TAIS NTAWV MOO ZOO (MT 8: 28-34)

Kwv tij Hmoob, cov neeg hauv lub teb chaws Nkas Das Las, mas lawv tsis yog haiv neeg Yus Das, mas lawv thiaj yug npua tej npoj coob coob cia tau siv tau tua ua txhiam xws noj haus. Thaum Huab Tais Yes Xus thiab cov thwj tim caij nkoj hla lub hiav txwv Nkas Lis Lais tuaj txog, mas muaj 2 tus neeg raug dab tawm tuaj ntsib Huab Tais Yes Xus, ces Huab Tais Yes Xus txawm ntiab cov dab ntawd mus nyob hauv pab npua, ces pab npua thiaj dhia tsag poob hauv dej tuag tas. cov neeg Nkas Das Las pom li ntawd, mas lawv khuv xim lawv cov npua, ces lawv thiaj thov kom Huab Tais Yes Xus thiab cov thwj tim tawm hauv lub teb chaws Nkas Das Las mus.
Kwv tij Hmoob, peb yuav pom tias cov neeg nyob thaj tsam Nkas Das Las no, mas lawv pom Huab Tais Yes Xus ua hwj huam cawm tau lawv 2 tug neeg raug dab tiag, lawv ntseeg tab sis lawv lub siab ntshaw lawv cov npua uas yog lawv lub cuab tam dua lawv ob tug neeg rov tsheej neeg, ces lawv thiaj tsis kam txais Huab Tais Yes Xus los nyob hauv lawv lub zos.
Muab piv rau peb, mas tej zaum muaj tej tus twb tau kev pab tau kev cawm ntawm Tswv Ntuj tsis kav nws tsis kam ntseeg; muaj tej tus twb pom Tswv Ntuj kiag ntawm nws ob lub qhov muag, tsis kav nws kuj tsis kam ntseeg, vim tias yam Tswv Ntuj ua rau nws pom thiab yam nws lub siab xav tau, mas tsis mus zoo xws tib yam. Muaj ib txhia nws ntseeg tab sis nws tsis kam txais Tswv Ntuj los nyob hauv nws, los kuj muaj.
Li ntawd mas kwv tij Hmoob, peb txhob ua xws li cov neeg hauv Nkas Das Las mog!
Peb txhob ntiab Huab Tais Yes Xus tawm hauv peb lub neej mus. Peb txhob tos kom Huab Tais Yes Xus ua qhov haum peb siab tso, peb mam kam txais Huab Tais Yes Xus los nyob hauv peb. 
Peb kav tsij qhib siab txais Huab Tais Yes Xus los ua peb tus Huab Tais thiab ua peb tus Tswv Ntuj.
Nyob zoo sawv daws.