Hnub Chiv Tim 2 Lub 7 Hli 2023 (Sunday Homily)

Lub cail Nyob Nruab Xyoo Hnub Hwm Leej Ntshiab Pob Zeb thiab Leej Ntshiab Paj Lug
Mas Tais 16:13-19
Yes Xus tuaj txog rau Xes Ntxas Les Fis Lis Pos teb, nws nug nws cov thwj tim li no : “Raws li teb chaws hais, Leej Neeg tus Tub yog leej twg ?” 14 Cov thwj tim hais tias : “Ib txhia hais tias yog Zam Ntxuav Plig. Ib txhia hais tias yog Es Lis. Tseem muaj ib txhia hais tais yog Yes Les Mias los yog ib tug nyob hauv cov Yaj Saub.” 15 Yes Xus ho hais rau nws cov thwj tim tias : “Ua li nej ne, nej hais tias kuv yog leej twg ?” 16 Pob Zeb txais nkaus tias : “Koj yog Leej Pleev, yog tus Tswv Ntuj muaj txoj sia nws Leej Tub.” 17 Yes Xus teb rau Pob Zeb tias : “Xis Moos, Yos Nas tus tub, koj txoj hmoov zoo. Vim qhov koj hais no, tsis yog nqaij thiab ntshav qhia koj, hos yog kuv Txiv nyob saum ntuj qhia koj. 18 Ua li mas kuv hais rau koj : koj yog Pob Zeb. Kuv yuav txhim kuv lub Koom Txoos nyob saum lub pob zeb no. Dab phem cov rooj loog yuav tsis yeej lub pob zeb no. 19 Kuv yuav muab Ntuj lub Ceeb Tsheej cov yuam sij rau koj. Koj khi yam twg nyob ntiaj teb no, Ntuj kuj saib yog khi nyob saum ntuj. Koj daws yam twg nyob ntiaj teb no, Ntuj kuj saib yog daws nyob saum ntuj.”

“Koj yog Leej Pleev, yog tus Tswv Ntuj Muaj Txoj Sia Leej Tub.”
Nyob Zoo…
Hnub Chiv no Lub Koom Txoos Kas Tos Liv hwm Leej Ntshiab Pob Zeb thiab Leej Ntshiab Paj Lug. Ob tug thwj tim no yog tus coj lub Koom Txoos hauv txoj kev ntseeg txog Yes Xus thiab hauv txoj kev tshaj Ntuj Lus. Thaum peb saib ntawm ob tug Leej Ntshiab no, muaj ob yam tseem ceeb uas nkawd ua piv txwv rau peb. Yam tim ib yog kev lees txoj kev ntseeg. Thiab yam tim ob yog kev tshaj Ntuj Lus.
Pob Zeb txoj kev ntseeg thiab txoj hauj lwm tshaj Ntuj Lus pib thaum nws lees tias Yes Xus yog Tswv Ntuj. Huab Tais Yes Xus muab lub Koom Txoos rau nws thiab tsa nws kom nws coj cov neeg ntseeg yav tom ntej. “Koj yog Pob Zeb, kuv yuav txhim kuv lub Koom Txoos rau saum lub pob zeb no.” Huab Tais Yes Xus cog lus tias “dab phem teb cov qhov rooj yuav tiv tsis taus lub pob zeb no.” Cog lus no uas rau peb paub tseeb tias yog peb ntseeg txog Yes Xus thiab ua raws li nws qhia, kev phem, kev tsaus ntuj nti, kev tsis zoo yuav yeej peb tsis tau. Tswv Ntuj yuav pov hwm peb, cov ntseeg sawv daws. Tsuas thov kom peb muaj kev ntseeg Ntuj tsis tu ncua. Pob Zeb tsis yog neeg txawj ntse tab sis mas ua cas ho Yes Xus thiaj cia siab rau nws, thiaj muab lub Koom Txoos rau nws? Kuj vim tias Yes Xus saib ntawm nws lub siab. Pob Zeb yog ib tug neeg zoo li peb sawv daws, tsis muaj suab muaj npe, tsis muaj hwj chim dab tsi, tsis paub ntaub paub ntawv thiab. Tab sis nws muaj lub siab nyiam Tswv Ntuj. Nws ua txhaum tab sis nws yuav lub siab tshiab. Nws tsis tso Tswv Ntuj pov tseg. Yes Xus hlub nws.
Paj Lug kuj yog ib tug neeg muaj kev rau siab tshaj Ntuj Lus kawg. Nws muab nws lub neeg tag nrho rau kev tshaj Ntuj Lus. Ib yam li Paj Lug hais hauv zaj nyem 2 tias: 
“Ntawm kuv mas txog lub caij hliv kuv roj tsha los txi Ntuj lawm. Txoj lub caij kuv yuav mus. Tas kuv sid, kuv tau ua ib ntsug zoo rog. Kuv khiav mus txog chaw lawm. Kuv tau ceev txoj kev ntseeg. Huab Tais tau nrog nraim kuv. Nws tso nws lub zog rau hauv kuv, kom kuv tshaj lub Moo, kom lub Moo nrov mus txog cov neeg teev pej kum dab pob ntseg.” 
Vim li ntawd, ntawm peb cov ntseeg sawv daws, ob yam no thiaj yog qhov tseem ceeb tshaj plaws hauv peb txoj kev ua tim khawv txog Yes Xus. Yes Xus cov thwj tim yuav tsum lees txoj kev ntseeg, tsis ntshai dab tsi, tsis txaj muag lees tias yus ntseeg txog Yes Xus. Thiab yuav tsum tshaj Ntuj Lus rau sawv daws paub.
Kwv tij sawv daws, Hauv Lub Moo Zoo hnub no, Huab Tais Yes Xus nug tias Luag tej hais tias Neeg Leej Tub yog Zam Ntxuav Plig, ib txhia hais tias yog Es Lias los Yes Les Mias. Ces nws nug peb sawv daws tias, ntawm peb mas Yes Xus yog leej twg? Hauv peb lub neej, Huab Tais Yes Xus yog leej twg? Peb yuav nyias nrhiav lo lus teb nyias tshaj tias rau yus tus kheej tias Yes Xus yog leej twg ntawm yus.