Zaj nyeem hnub tim 10 lub 7 hli 2023 (Daily reflection)

ZAJ NYEEM HNUB TIM 10 LUB 7 HLI, HNUB OB LUB LIS PIAM 14 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 9: 18-26)

Cov kwv tij, hnub no Mas Tais Ntawv Moo Zoo hais txog Huab Tais Yes Xus tsa ib tug nom saib lub tsev txoos tus ntxhais sawv hauv qhov tuag rov los, thiab Huab Tais Yes Xus lub hwj chim pab kom tus poj niam tsob ntshav rov zoo.
Peb pom tias nkawd 2 leeg puav leej ntseeg tias Huab Tais Yes Xus ua tau li ntawd tiag. 
Tsis tau muaj ib tug neeg yuav tsa tau tus tuag rov sawv, tsis tau muaj ib tug neeg tuag lawm yuav rov muaj txoj sia ntxiv. Tab sis tus nom saib lub tsev txoos nws muaj lub siab ntseeg tias Huab Tais Yes Xus muaj peev xwm tsa tau tus tuag sawv rov los, Huab Tais Yes Xus yog tus yeej txoj kev tuag. Nws ntseeg li ntawd, nws thiaj tuaj thov Huab Tais Yes Xus mus tsa nws tus ntxhais.
Tus poj niam tsob ntshav, nws siv nyiaj ntau kho nws npaum cas los tsis zoo, nws txom nyem tau 12 lub xyoos lawm, nws zoo li ib tug neeg muaj txhaum loj, vim cov Yus Das txoj cai hais tias tus poj niam twg tsob ntshav, mas tus ntawd tsis huv, tsis pub tus twg chwv nws thiab tsis kheev nws nyob ze leej twg los yog kov leej twg. Nws nyob txom nyem kawg. Hnub nws hnov luag tej hais tias Huab Tais Yes Xus tuaj txog lub zos nws nyob, nws ntseeg tias Huab Tais Yes Xus muaj hwj huam kho tau nws, tab sis vim txoj cai txiav tias nws yog neeg tsis huv, nws thiaj hnyiag mus kov Huab Tais Yes Xus tw tsho xwb. Txawm li ntawd, los nws ntseeg tias nws yuav zoo.
Kwv tij, nkawd lub siab ntseeg pab kom nkawd tau li siab xav.
Hnub no, nyob hauv peb lub neej sab cev nqaij tsis muaj mob, tab sis hauv sab ntsuj plig mas peb tab tom mob hnyav vim peb qhov txhaum peb niaj hnub ua. Li ntawd, thov kom peb ntseeg txog Huab Tais Yes Xus tias nws yog tus cawm tau peb tus plig, nws yog tus tsa peb sawv hauv qhov tuag, ces peb yuav nrhiav Huab Tais Yes Xus txhua hnub, thov Huab Tais Yes Xus tsa peb sawv los dua, cev tes txais Huab Tais Yes Xus lub hwj chim los ntxuav peb kom rov zoo tuaj mog.
Nyob zoo sawv daws.