Zaj nyeem hnub tim 11 lub 7 hli 2023 (Daily reflection)

ZAJ NYEEM HNUB TIM 11 LUB 7 HLI, HNUB NCO TXOG LEEJ NSHIAB NPES NES DIS
COV LUS NYOB HAUV MAS TAIS NTAWV MOO ZOO (MT 9: 32-37)

Kwv tij Hmoob, lub Moo Zoo piav tias thaum Huab Tais Yes Xus pom tsoom pej xeem coob coob muaj mob txiab nkeeg, lawv ua neej sab thiab qaug zog ces Huab Tais Yes Xus hlub lawv. Huab Tais Yes Xus paub tias nws muaj lub sij hawm 3 xyoos cia ua Tswv Ntuj txoj hauj lwm xwb, nws yuav pab coj Tswv Ntuj lub Ceeb Tsheej mus cuag sawv daws tsis tau, nws thiaj hais rau cov thwj tim kom thov Tswv Ntuj xaiv lawv los pab nws ua txoj hauj lwm no. Huab Tais Yes Xus hais tias “Qoob loo ntau kawg, nej thov tus tswv qoob kom xa ib co tub zog tuaj sau nws cov qoob.”
Kwv tij, Huab Tais Yes Xus lo lus no, yog lo lus ua ntej nws yuav tsa cov thwj tim ua Hauv Paus Xa Lus, yog yuav tsa cov neeg pab tshaj lub Moo Zoo rau ib zeej tsoom.
Niaj hnub no peb yuav coj Huab Tais Yes Xus lub Moo Zoo mus cuag peb cov kwv tij, cov nyob ib puag ncig tsis tau, yog tias peb ntsia tsis txog lawv kev txom nyem, peb tsis muaj lub siab hlub txog lawv. 
Tib neeg kev sab thiab qaug zog, tsis yog neeg lub cev ua hauj lwm hnyav tsis tau so ces lawv sab thiab qaug zog xwb. Qhov sab thiab qaug zog Huab Tais Yes Xus xav kom peb ntsia pom yog lawv tus plig sab thiab qaug zog, lawv tus plig nrhiav tsis tau ib qhov chaw cia so los siav, lawv tus plig nrhiav tsis tau ib pluas mov yug lub zog.
Vim li ntawd, thiaj yog peb cov twb paub txog Huab Tais Yes Xus lub luag hauj lwm yuav tau coj lawv tus plig los so nyob hauv Huab Tais Yes Xus, coj Huab Tais Yes Xus lo lus mus yug cawm lawv tus plig.
Kwv tij, niaj hnub no cov neeg sab thiab qaug zog sab ntsuj plig muaj coob muaj ntau, peb puas yuav ua tus txiv coj ke rau lawv puas tau, peb puas yuav piav txog Tswv Ntuj lub Ceeb Tsheej rau lawv tau?
Kwv tij, peb yuav niaj hnub thov Tswv Ntuj kom peb muaj ib lub siab kub lug ua txoj hauj lwm sau Tswv Ntuj cov qoob hauv Tswv Ntuj daim teb mog.
Nyob zoo sawv daws.