Zaj nyeem hnub tim 8 lub 7 hli 2023 (Daily reflection)

ZAJ NYEEM HNUB TIM 13 LUB 7 HLI, HNUB NCO TXOG LEEJ NTSHIAB HEES LIS NKOS OB
COV LUS NYOB HAUV MAS TAIS NTAWV MOO ZOO (MT 10: 7-15)

Huab Tais Yes Xus hais tias “Nej ceeb toom tias Ntuj lub Ceeb Tsheej los txog ze lawm.” Cov kwv tij, Ntuj lub Ceeb Tsheej nyob hauv peb sawv daws yog tias peb txawj sib nyiam sib hlub, peb ua neej nyob kaj siab lug. Yog li mas Huab Tais Yes Xus thiaj ntuas cov Hauv Paus Xa Lus tias “Nej ntsib tus neeg mob, mas nej kho lawv kom zoo; nej pom tus neeg tuag, nej tsa nws kom ciaj rov los; nej ntsib tus neeg tsis huv, nej kho nws kom rov huv tuaj; nej pom tus neeg raug dab, mas nej ntiab dab rau nws.”
Tus neeg tsis muaj mob, tus neeg ua neej nyob li tus muaj sia, tus neeg nyob dawb nyob huv, tus neeg muaj lub siab zoo; mas nws nyob kaj lug, zoo li nws tau pom Ntuj lub Ceeb Tsheej lawm. Puas yog?
Yog li Huab Tais Yes Xus thiaj xav kom cov ua Tswv Ntuj txoj hauj lwm coj kev kaj lug kaj nrig mus tseb rau hauv sawv daws nruab siab, kom cov ua Tswv Ntuj txoj hauj lwm pab tsoom sid daws lawv tej kev txom nyem; pab lawv kom txawj xaiv yuav qhov zoo tso tseg kev ua phem. Lawv yuav ua tau li ntawd, mas yog tsum hlub thiab nyiam tsoom sid.
Kwv tij Hmoob, peb sawv daws yuav tau sib pab tsim kev thaj yeeb, kev sis nyiam sis hlub, mas peb sawv daws thiaj yuav nyob tau kaj siab li nyob hauv Tswv Ntuj lub ceeb Tsheej mog.
Nyob zoo sawv daws.