Zaj nyeem hnub tim 17 lub 7 hli 2023 (Daily reflection)

ZAJ NYEEM HNUB TIM 17 LUB 7 HLI, HNUB OB LUB LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 10: 34-11: 1)

Cov kwv tij Hmoob, thaum nej hnov Huab Tais Yes Xus cov lus hais tias “Kuv tsis coj kev thaj yeeb tuaj rau lub ntiaj teb, tab sis kuv coj hniav ntaj nhiav riam tuaj. Kuv tuaj ua kom tub sawv los tiv txiv, ntxhais sawv los tiv niam, nyab sawv los tiv pog”, mas nej xav li cas?
Tej zaus nej yuav xav tias yog li thaum peb tig los ntseeg txog Yes Xus lawm, ntshai peb lub neej yuav muaj teeb meem loj; peb yuav tsis haum rau peb cov kwv tij, peb kawg tsis haum rau peb niam peb txiv, los yog tsis haum rau peb cov me tub me nyuam.
Yeej muaj tseeb li ntawd tiag! Tiam sis yog peb ua zoo xav ua zoo kawm Huab Tais Yes Xus cov lus qhia, peb yuav pom tias Huab Tais Yes Xus qhia kom peb sib nyiam sib hlub, peb yuav sib pab sib nres. Yog li mas cov kwv tij, Huab Tais Yes Xus cov lus nej hnov hnub no, nej txhob muab ua chaw khuam nej cia kom txhob ua zoo rau nej cov txheeb ze.
Lub ntsiab hauv Huab Tais Yes Xus lo lus no, yog Huab Tais Yes Xus xav kom peb xaiv Huab Tais Yes Xus ua ntej txhua yam, txawm tias peb tsev neeg los yog cov txheeb ze tsis pom zoo. 
Thaum peb xaiv Huab Tais Yes Xus lawm, txawm luag tej sawv los tiv peb, los peb tsis tso kev nyiam lawv pov tseg, peb tsis tso kev pab lawv pov tseg. Qhov peb ua mas yog haj yam nyiam lawv kom ntau dua qub, haj yam pab lawv kom ntau tshaj yav tas.
Kwv tij, nej txhob xav tias ‘kuv cov txheeb ze lawv tsis ntseeg txog Yes Xus li kuv, lawv tsis ua Ntuj kev cai li kuv, kuv tsis yuav hlub lawv, nyiam lawv, pab lawv’, tiam sis nej yuav xav tias ‘kuv twb paub Huab Tais Yes Xus lawm, kuv twb muab Huab Tais Yes Xus ua kuv tus Tswv Ntuj, Tswv Ntuj twb yog kev nyiam, yog li mas kuv yuav tau nyiam sawv daws tsis hais tus hlub kuv los tus ntxub kuv’ thiab nej yuav xav tias ‘kuv ua qhov zoo tsis yog kuv ua kom lawv qhua kuv, tiam sis kuv ua qhov zoo kom lawv qhuas kuv tus Tswv Ntuj. Kuv thov cev kuv kev nyiam kev hlub no rau kuv tus Tswv Ntuj’.
Peb xav li no, peb thiaj muaj lub siab txawj nyiam txawj hlub cov sawv los tiv peb mog. Nyob zoo sawv daws.