Zaj nyeem hnub tim 18 lub 7 hli 2023 (Daily reflection)

ZAJ NYEEM HNUB TIM 18 LUB 7 HLI, HNUB PEB LUB LIS PIAM 15 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 11: 20-24)

Kwv tij Hmoob sawv daws, lub Moo Zoo hnub no yog Huab Tais Yes Xus tsawm lub nroog Kos Las Ntxis, Npes Xais Das, thiab Kas Fas Naus; vim cov neeg hauv 3 lub nroog no pom Huab Tais Yes Xus ua hwj huam ntau tshaj lwm lub zos, tab sis lawv tsis ntseeg tias Huab Tais Yes Xus tuaj ntawm Tswv Ntuj tuaj, lawv tsis hloov siab tshiab los ntseeg txog Yes Xus.
3 lub zos no yog ntawm qaum dej ntuj Nkas Lis Lais. 
Ntawv Moo Zoo tsis tau piav tias Huab Tais Yes Xus ua hwj huam dab tsi nyob hauv lub zos Kos Las Ntxis, tab sis hauv lub zos Npes Xais Das thiab Kas Fas Naus, mas Ntawv Moo Zoo hais txog Huab Tais Yes Xus cov hauj lwm.
Nyob hauv lub zos Npes Xais Das, Huab Tais Yes Xus tau ua kom 5 lub ncuav mov ntsu tuaj yug tsib txhiab leej noj, thiab Huab Tais Yes Xus kho tus dig muag. Tsis tas li ntawd, lub zos Npes Xais Das kuj yog lub zos Huab Tais Yes Xus 6 tus thwj tim nyob; yog Xis Moos Pob Zeb, As Nres, Yas Kos, Zam, Fis Lis Pos thiab Nas Tas Nais.
Hais txog lub zos Kas Fas Naus, yog lub zos Huab Tais Yes Xus ua hwj huam yees ntxwv ntau tshaj plaws. Huab Tais Yes Xus cov hauj lwm yog: kho cov neeg muaj txiab mob, kho tus xab txheeb tus tub txib, kho Pob Zeb niam tais, kho tus neeg tuag ceg kom rov mus taus kev, kho tus tuag tes, tsa Yais Los tus ntxhais tuag sawv rov los, kho tus poj niam tsob ntshav, qhia Xis Moos Pob Zeb ntes ntses, thiab ntiab cov neeg raug dab.
Cov kwv tij, Huab Tais Yes Xus ua hwj huam ntau npaum no, thiab Huab Tais Yes Xus niaj hnub nrog lawv nyob ua ke, tab sis lawv tsis nco pom. Lawv tsuas xav tsa Huab Tais Yes Xus ua lawv tus vaj ntaus rog nrog cov Los Mas xwb, lawv tsuas xav nyob dawb cia Huab Tais Yes Xus pub mov lawv noj tsau plab xws li thaud lawv cov yawg koob noj cov mov Mas Nas xwb. Lawv tsis nco pom tias Huab Tais Yes Xus yog tus tuaj ntawm Tswv Ntuj tuaj, yog Leej Pleev tus tuaj cawm lub qab ntuj neeg.
Kwv tij Hmoob, lawv tsis ntseeg, mas lawv txoj hmoov phem; lawv muab hlob, mas lawv muaj txim.
Li ntawd mas cov kwv tij, niaj hnub no Huab Tais Yes Xus twb nyob nraim hauv peb txhua leej txhua tus, Huab Tais Yes Xus twb ua hwj huam cawm peb hauv dab phem cov hluav taws; peb puas yuav ntseeg txog Huab Tais Yes Xus tiag tiag, peb puas ntseeg tias Huab Tais Yes Xus yog Tswv Ntuj Leej Tub, yog tus cawm peb.
Nyob zoo sawv daws.