Zaj nyeem hnub tim 22 lub 7 hli 2023 (Daily reflection)

ZAJ NYEEM HNUB TIM 22 LUB 7 HLI, HNUB HWM LEEJ NTSHIAB MAB LIAB MAS NTAS LAS
COV LUS NYOB HAUV ZAM NTAWV MOO ZOO (Z 20: 11-18)

Cov kwv tij Hmoob, hnub no lub Koom Txoos hwm thawj tus neeg tau pom Huab Tais Yes Xus sawv hauv cov tub tuag rov los, yog Mab Liab Mas Ntas Las. 
Ntawv Moo Zoo piav tias Mab Liab Mas Ntas Las nrog ib pab poj niam lawv raws Huab Tais Yes Xus thiab cov thwj tim qab, cov poj niam yog cov ua cov hauj lwm tsob hwb Huab Tais Yes Xus thiab cov thwj tim. Mab Liab Mas Ntas Las raws Huab Tais Yes Xus mus txog lub roob Nkos Nkos Tas, nws pom lawv muab Huab Tais Yes Xus dai saum tus ntoo cuam, thiab nrog Nis Kos Des Mos thiab Yos Xes coj Huab Tais Yes Xus lub cev mus zwm hauv qhov ntxa.
Lub Moo Zoo hnub no, piav tias thaum Mab Liab Mas Ntas Las tsis pom Huab Tais Yes Xus lub cev lawm, nws txhos caug quaj nyob ntawm lub qhov ntxa, ces Huab Tais Yes Xus tawm los rau nws pom thiab hais kom nws coj lub moo no mus qhia rau cov thwj tim.
Kwv tij, vim Mab Liab Mas Ntas Las coj lub moo zoo no mus hais rau cov thwj tim, mas peb thiaj hais tias Mab Liab Mas Ntas Las yog tus hauv paus xa lus rau cov Hauv Paus Xa Lus.
Muaj kwv huam piav tias Mab Liab Mas Ntas Las mus txog Fab Kis teb, ces nws coj lub neej twj cuab nyob ntawd mus txog hnub nws tuag.
Mab Liab Mas Ntas Las yog tus tau txoj hmoov zoo, mas lub Koom Txoos thiaj saib nws yog ib tug Leej Ntshiab.
Thaum xyoo 2016 lub 6 hli ntuj tim 10, Vaj Qhia Fas Ntshis Kus thiaj pom zoo kom muab hnub nco txog Mab Liab Mas Ntas Las saib ua hnub hwm xws li cov hnub hwm Huab Tais Yes Xus cov Hauv Paus Xa Lus.
Kwv tij, Leej Ntshiab Mab Liab Mas Ntas Las lub neej qhia rau peb paub tias Huab Tais Yes Xus pub kom cov neeg siab dawb siab huv, ruaj nreb rau txoj kev ntseeg xws li nws tau pom Huab Tais Yes Xus. Yog li mas peb sawv daws yuav xyaum tus neeg ntseeg ruaj nreb raws nraim Huab Tais Yes Xus khov kho, thiab ua neeg siab dawb, mas peb thiaj yuav pom Huab Tais Yes Xus xws li Leej Ntshiab Mab Liab Mas Ntas Las mog.
Nyob zoo sawv daws.