Hnub Chiv Tim 23 Lub 7 Hli 2023 (Sunday Homily)

ZAJ NYEEM HNUB TIM 23 LUB 7 HLI, HNUB CHIV LUB LIS PIAM 16 CAIJ NYOB NRUAB XYOO
Hnub Chiv Tim 23 Lub 7 Hlis Ntuj 2023
Lub cail Nyob Nruab Xy

Yes Xus tseem hais ib zag txhais rau lawv mloog tias : Ntuj lub Ceeb Tsheej yog zoo li ib tug tseb noob nplej zoo rau hauv nws daim teb. Tiam sis, thaum cov neeg tsaug zog tas,nws tus yeeb ncuab tuaj tseb noob nroj xyaw rau cov nplej, tas nws rov mus lawm.  Thaum cov nplej tuaj thiab thaum txhawv, kuj pom muaj nroj tuaj xyaw thiab. Cov tub zog mus cuag tus tswv, hais rau nws tias : “Yawg hlob, koj tau tseb ib cov noob nplej zoo rau hauv koj daim teb tsis sub? Vim lis cas thiaj li muaj nroj xyaw ?” Tus tswv teb tias : “Yog ib tug yeeb ncuab ua qhov ntawd.” Cov tub zog hais tias : “Koj puas xav kom peb dob cov nroj ntawd ?” Tus tswv hais tias : “Kuv tsis xav. Ntshai tsam thaum nej dob nroj nej kuj yuav rho tau nplej thiab. Cia ob hom ua ke hlob mus txog lub caij sau nplej. Thaum txog lub caij sau nplej kuv yuav hais rau cov sau nplej tias : Nej xub sau nroj los pav ua tej tes tso, yuav muab hlawv. Ces nej mam sau nplej los rau hauv kuv lub txhab.” 

“Nej xub sau nroj pav ua tej teg cia hlawv, hos nej sau cov nplej rau hauv kuv lub txhab.”
Nyob zoo…
Kwv tij sawv daws, Ntawv Moo Zoo hnub no, Huab Tais Yes Xus ua zaj paj lug txog nroj. Nws piav Ntuj lub Ceeb Tsheej kom sawv daws to taub yooj yim. Lub ntsiab lus ntawm zaj no yogh ais tias: tus neeg tseb hauv zaj no yog Huab Tais Yes Xus, ces tus yeeb ncuab yog tus dab phem. Cov noob zoo yog cov mloog Tswv Ntuj lo lus ces lawv ua raws li Ntuj cov lus qhia. Ntuj lub Ceeb Tsheej yog lawv li. Tsis tas li ntawd, cov noob nroj yog cov tsis mloog Tswv Ntuj lo lus, lawv tsis ua raws li Ntuj lo lus qhia. Cov no yog dab phem cov me nyuam. Cov tub txib thiab cov sau nplej yog Ntuj cov tshiab.
Kwv tij sawv daws, 2-3 lub lis piam dhau los, Huab Tais Yes Xus qhia txog Ntuj lub Ceeb Tsheej. Nws ua zaj paj lug xav kom sawv daws nkag siab yooj yim dua. Cov tau ntsib Ntuj lub Ceeb Tsheej yog cov mloog Tswv Ntuj lo lus thiab ua raws li Tswv Ntuj cov lo qhia thiab Tswv Ntuj lo lus tawg paj txi txiv hauv yus lub neej. Sawv daws tau txais Tswv Ntuj lub txiaj ntsim hauv yus lub neej, tsis hais neeg zoo los tsis zoo, tsis hais neeg pluag los nplua nug, tsis hais neeg me los neeg laus. Tswv Ntuj pub sij hawm rau peb sawv daws ib yam li thiab. Txhua tus muaj sij hawm mloog Tswv Ntuj Lo Lus, txais Tswv Ntuj lo lus thiab tawg paj txi txiv. Yus tawg paj txi txiv tau kuj txhais tias, ib yam li, hauv yus yim neeg yus puas muaj kev nyiam kev hlub rau yus me tub me nyuam, rau yus niam yus txiv. Ntawm niam tsev txiv tsev mas, nej puas sib nyiam sib hlub, nej puas sib pab sib pawg, sib koom tes sib pab qhia cov me tub me nyuam kom paub Tswv Ntuj, kom lawv paub mus teev Ntuj. Ib txwm mas Yes Xus qhia kom peb zam txhaum rau cov ua txhaum rau peb. Nej zam txim puas tau? Nyob hauv yus yim neeg puas muaj kev zam txim? Cov no yog tus yam ntxwv tias Ntuj lub Ceeb Tsheej tau pib hauv peb lub neej lawm. Qhov no yog lub cim txhais tias yus tab tom ua neej nyob hauv Tswv Ntuj lub Ceeb Tsheej lawm.
Ntawm cov tsis txais Tswv Ntuj lo lus, tsis mloog thiab tsis ua raws li Ntuj lo lus mas, lawv lub neej kuj zoo li ib co noob nroj hauv cov nplej, cov neeg zoo. Thauj txoj lub caij sau qoob, mas Tswv Ntuj yuav hais rau cov sau nplej los Ntuj cov tshiab kom xub sau nroj pav ua tej teg cia hlawv, vim rau qhov hais tias cov nroj no tsis muaj qab hau dab tsi.
Kwv tij sawv daws, Tswv Ntuj pub sij hawm rau peb txhua leej txhua tus kom siv thiab faib Tswv Ntuj lub txiaj tsim rau luag tej, Tswv Ntuj pub sij hawm rau peb kom txawj sib nyiam sib hlub, kom txawj zam txim zam txhaum rau cov nyob ib puag ncig peb. Thov kom peb siv sij hawm ntawd kom muaj qab hau tshaj plaws, ces peb yuav tawg paj txi txiv ntau nyob hauv Tswv Ntuj lub Ceeb Tsheej. 
Nyob zoo sawv daws!