Zaj nyeem hnub tim 24 lub 7 hli 2023 (Daily reflection)

ZAJ NYEEM HNUB TIM 24 LUB 7 HLI, HNUB OB LUB LIS PIAM 16 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 12: 38-42)

Cov kwv tij, tej zaum nej twb xav tias ua cas Huab Tais Tswv Ntuj tsis ua kiag hwj huam rau ntiaj teb neeg pom, mas sawv daws thiaj yuav zoo siab tig los ntseeg Ntuj kom tas; ua cas Huab Tais Yes Xus tsis tawm los rau sawv daws pom, mas sawv daws thiaj yuav tso siab rau Huab Tais Yes Xus tag siab.
Kwv tij Hmoob, Tswv Ntuj tsis ua li ntawd, Huab Tais Yes Xus kuj yuav tsis ua li thiab. Vim tias Huab Tais Yes Xus tsis yog tus zoo li peb lub tswv yim xav, tiam sis Huab Tais Yes Xus yog tus Tswv Ntuj tsob hwb ntiaj teb neeg. Huab Tais Yes Xus xav kom peb nyiam nws vim nws nyiam peb, tsis yog kom peb nyiam nws vim nws yuam peb.
Yog li mas thaum cov Fas Lis Xais thiab cov Kws Ntawv hais kom Huab Tais Yes Xus ua ib lub cim rau lawv pom, Huab Tais Yes Xus thiaj teb rau lawv tias “Nej yuav tsis pom ib lub cim dab tsi, lub cim nej pom kawg yog tus Yaj Saub Yos Nas lub cim xwb.”
Cov kwv tij, Yos Nas lub cim yog zoo li cas? Thaum Huab Tais Tswv Ntuj txib Yos Nas mus tshaj Tswv Ntuj Lo Lus rau cov neeg ua txhaum hauv lub tsheej Nis Nis Vas, mas Yos Nast sis kam mus, nws khiav deb ntawm Huab Tais Tswv Ntuj, ces Huab Tais Tswv Ntuj thiaj cia tus vaj ntses tuaj nqos Yos Nas mus nyob hauv plab tau 3 hnub, mam rov tso Yos Nas tawm. Yos Nas thiaj ua ib siab mus tshaj Tswv Ntuj Lo Lus rau cov neeg hauv lub tsheej Nis Nis Vas.
Huab Tais Yes Xus hais tias lub cim lawv yuav pom yog Yos Nas lub cim, kuj yog Huab Tais Yes Xus qhia lawv tias qhov lawv yuav pom mas yog Huab Tais Yes Xus yuav tuag mus zwm av 3 hnub, ces nws yuav sawv rov los, Huab Tais Yes Xus kev sawv rov los yuav coj txoj kev cawm mus txog cov neeg ntseeg txog nws.
Kwv tij, peb ntseeg txog Huab Tais Yes Xus, mas peb thiaj yuav txais kev cawm. Peb txhob xav tias peb paub Huab Tais Yes Xus zoo lawm, peb txhob xav tias tos Huab Tais Tswv Ntuj ua ib lub cim rau pom tso. Peb kav tsij thov Huab Tais Tswv Ntuj pub lub qhov muag tshiab rau peb lub tswv yim, kom peb ntsia pom lub cim Huab Tais Yes Xus qhia peb ntawd mog.
Nyob zoo sawv daws.