Cov neeg ntseeg Nyab Laj uas ploj lawm rov qab mus teev Ntuj, txawm tias yuav raug txwv kuj xij

Tran yug nyob hauv ib yim neeg ntseeg Kav Tos Liv, tab sis nws tsis tau mus tsev teev Ntuj ntau caum xyoo los txog rau xyoo 2021. 

Tran yog ib tug txiv neej 76 xyoo, nws yog neeg ntseeg Kav Tos Liv kub siab lug nyob hauv nws lub zos Chieng Pha Phong Lai, hauv lub xeev Son La nyob Nyab Laj teb. 

Tran hais tias : “Kuv muaj kev sov siab heev rau kuv lub neej thiab kuv txoj kev ntseeg, txij hnub kuv tau ntsib tus Txiv Plig nyob hauv peb zos thawj zaug nyob hauv 2 xyoos dhau los”. Ib yam li lub nroog Tran uas muaj ntau pua leej thim kev ntseeg, thiab cov neeg tsis ntseeg kuj koom nrog lub Koom Txoos txhua xyoo nyob hauv cov thaj chaw uas yav tag los txoj kev ntseeg raug txwv.

Tran hais tias : nws rov qab mus tsev teev Ntuj, yog vim xyoo 2021 Txiv Plig Nguyen Van Thanh uas nyob hauv nws lub zos tuaj saib nws. Nws nco tau tias txij thaum nws tsiv ntawm lub xeev Nam Dinh los nyob rau qhov chaw tshiab, thiab xyoo 1971 nws yuav poj niam, mas cov neeg feem coob tsis teev hawm dab tsi li, vim tseem hwv txoj cai txwv. Lub caij ntawd tsis muaj tsev teev Ntuj thiab tsis muaj cov Txiv Plig nyob thaj tsam ntawd li, ces Tran thiaj tsis teev hawm dab tsi li. Tab sis 2 xyoos tag los, Txiv Plig Nguyen Van Thanh thiab ob peb tug neeg ntseeg tau tuaj xyuas nws. 

Txiv Plig kom ob peb tug neeg ntseeg ntawd pab txuas cov xov hluav taws xob nyob hauv Tran tsev. Ces lawv tau sib tham txog ntau yam lom zem, thiab Txiv Plig caw nws kom rov qab mus teev Ntuj. 

Tam sim no Tran niaj hnub mus teev Ntuj txhua Hnub Chiv nyob hauv nws lub zos, thiab tsis ntev tag los no nws kuj tau pub tej yam toob xib siv hluav taws xob rau lub tsev tshaj lub Moo Zoo. Nws hais tias : 

“Kuv tu siab rau kuv cov txhaum, uas kuv tau tso kuv txoj kev ntseeg pov tseg. Kuv vam tias cov suab hu nkauj yuav ua kom coob leej neeg txav los nyob ze Tswv Ntuj”.

Txoj kev ntseeg raug txwv nyob hauv 3 lub xeev, xws li Dien Bien, Hoa Binh thiab Son La. Xyoo 2015 cov Txiv Plig thiaj tau txais lus tso cai kheev lawv mus nyob hauv cov xeev ntawd. Thiab cov neeg ntseeg Kav Tos Liv nyob hauv cov xeev ntawd kuj maj mam hlob zuj zus, raws li lub Koom Txoos kev tshuaj xwm hauv xyoo 2022.