Tswv Qhia Lefebvre, ua kom cov neeg ntseeg nyob Mas Les Xias ntxhov quav niab

Lub tuam khw uas ntxhov quav niab nyob ntawm ntug nroog Kuala Lumpur, dhau ntawm cov khw lawm, tseem muaj lub tsev teev Ntuj uas Es Lis Xas Npes nquag mus koom teev Ntuj Hnub Chiv thiab. Es Lis Xas Npes muaj 27 xyoo, nws hais tias tsuas muaj Es Lis Xas Npes ib leeg xwb thiaj nyob tus hauv txoj kev teev Ntuj ua lus Latin xws li yav thaum ub. Tsis yog Es Lis Xas Npes ib leeg xwb, tseem muaj cov neeg ntseeg li ntawm 120 leej koom teev Ntuj txhua Hnub Chiv nyob hauv lub tsev teev Ntuj ntawd. Thiab cov kab ke yog ua raws li cov Txiv Plig ntawm Leej Ntshiab Pis Os tim 10.

Lawv ua thaj txi Ntuj raws Tridentine xyoo 1962 thiab tus qauv ntawm cov kab ke yog tus qauv uas siv ua ntej Vas Tis Kas Ob. Thiaj ua kev ntxhov rau cov neeg ntseeg lawv ua xyem xyav txog cov kab ke ntawm SSPX.

Es Les Xas Npes hais tias : “Peb mob siab, vim nws txhawb peb txoj kev ntseeg. 

Cov tub ntxhais hluas coob leej muab siab rau txog txoj kev ntseeg uas tsuag zuj zus nyob hauv ntau lub zos.” 

Lub thaj txi Ntuj uas nws mus koom ua lus Latin, ces muaj tsawg leej uas lawv thiaj nkag siab, vim lawv tsis paub lus Latin. Tab sis lawv maj mam saib nyob hauv cov ntawv Aas Kiv, kom lawv nkag siab. Es Lis Xas Npes thiab cov neeg uas lawv koom lub thaj txi Ntuj Trident uas raug rho tawm hauv xyoo 2021, ua kom lawv paub tias lawv yog ib feem ntawm kev pib sib tawg los ntawm Tswv Qhia Lefebvre. 

Yog tus Tswv Qhia Fab Kis uas txhim tsa tus thawj coj ntawm SSPX, hnub tim 30 lub 6 hli 1988. Nws tau tsa 4 tug Txiv Plig ua Tswv Qhia tsis tau txais lus tso cai los ntawm Vas Tis Kas. Hais txog lawv txoj kev ua li ntawd, mas raug Vas Tis Kas rhuav tshem tawm thiab tsis lees paub lawv.

Tam sim no nyob hauv pawg neeg ntseeg no muaj 3 tug Tswv Qhia, tab sis ib tug tuag lawm, vim nws laus. Tam sim no kuj muaj 700 tus Txiv Plig nyob thoob ntiaj teb uas tseem siv tus qauv qub tsis haum Vas Tis Kas Ob, thiab tas cov Vaj Qhia uas raug xaiv tsa txij ntawd los, lawv nyob tsis ncaj ntawm txoj kab kev ntseeg Kav Tos Liv thiab lawv tsis muaj kev sib txuas lus. 

Cov tsev teev Ntuj SSPX uas Es Lis Xas Npes mus teev Ntuj yog pib txij xyoo 1990 los, thiab nws maj mam rub kom neeg nkag coob zuj zus. Cov neeg sib koom teev Ntuj Hnub Chiv, 60 feem pua yog cov tub ntxhais hluas thiab cov tsev neeg uas hnub nyoog qis dua 40 xyoo. 

SSPX tseem muaj 2 lub tsev teev Ntuj nyob Mas Les Xias teb thiab, ib lub yog nyob  Kuching, hauv lub xeev Sarawak uas txhim tsa xyoo 2018. Hos ib lub yog nyob Kota Kinabalu, hauv lub xeev Sabah uas txhim tsa xyoo 2004.

Cov lus no yog hais raws li SSPX lub tsev vas los sis Website tshaj tawm.