Zaj nyeem hnub tim 25 lub 8 hli 2023 (Daily reflection)

ZAJ NYEEM HNUB TIM 25 LUB 8 HLI, HNUB NCO TXOG LEEJ NTSHIAB LUS IS CUAJ, TUS VAJ FAB KIS
COV LUS NYOB HAUV MAS TAIS NTAWV MOO ZOO (MT 22: 34-40)

Kwv tij Hmoob sawv daws, lub Moo Zoo hais tias cov cov Fas Lis Xais xa ib tug kws lij choj tuaj sim Huab Tais Yes Xus saib Huab Tais Yes Xus paub Txoj Cai npaum li cas, Huab Tais Yes Xus thiaj hais lus ua rau cov Xas Dus Kais tws lus tau. Tus kws lij choj nug tias tas nrho cov lo lus qhia hauv Txoj Cai mas lo lus twg loj tshaj, ces Huab Tais Yes Xus thiaj teb nws cov lus tias muaj 2 lo lus loj dua cov yog lo lus tias ‘nyiam Huab Tais Tswv Ntuj’ thiab lo lus tias ‘nyiam lwm tus’.
Kwv tij Hmoob sawv daws, cov Fas Lis Xais yog cov neeg kub siab coj Mais Xes txoj cai, ntawm cov Xas Dus Kais mas lawv yog cov nom thiab cov Leej Choj tswj kev teev hawm Tswv Ntuj nyob hauv lub Tuam Tsev Teev Ntuj.
Cov Fas Lis Xais thiab cov Xas Dus Kais yog cov muaj kev kawm, ces lawv thiaj yog cov Kws Ntawv Ntshiab, tab sis lawv txoj kev ntseeg tsis sib xws, yog li mas cov Fas Lis Xais thiab cov Xas Dus Kais thiaj nyiam muaj lus sib cav ntau txog lawv zaj ntseeg. 
Hnub no cov Fas Lis Xais xav tias yog lawv ua kom Huab Tais Yes Xus tws lus, mas yog lawv tau yeej cov Xas Dus Kais lawm vim Huab Tais Yes Xus twb ua rau cov Xas Dus Kais twb swb rau Huab Tais Yes Xus lawm.
Kwv tij, cov Fas Lis Xais thiab cov Xas Dus Kais xav zoo li ntawd, ces lawv thiaj tsuas paub txoj kev ntseeg xwb, lawv tsis to taub txog qhov lawv ntseeg; lawv nyias xav kom nyias tog yeej, lawv tsis yog sib cav kom nkag siab txog qhov lawv ntseeg.
Hnub no Huab Tais Yes Xus cov lus teb thiaj ua rau tej tus Fas Lis Xais thiab Xas Dus Kais paub tias yav tas los lawv yuam kev loj. Vim tias Huab Tais Yes Xus tsis yog paub Txoj Cai xwb, Huab Tais Yes Xus tseem to taub Txoj Cai thiab; yog kom ‘sib nyiam sib hlub’.
Kwv tij Hmoob, peb cov ntseeg txog Yes Xus, los yog ua Ntuj kev cai, mas tsis yog peb yuav tsum ‘paub’ peb txoj kev ntseeg xwb; tab sis peb tsum ‘to taub’ qhov peb ntseeg thiab, mas peb thiaj yuav ua tau raws li peb txoj kev ntseeg mog. 
Nyob zoo sawv daws.