Hnub Chiv Tim 13 Lub 8 Hli 2023 (Sunday Homily)

Hnub chiv tim 13 lub 8 hli ntuj 2023

Mas Tais 14:22-33

“Huab Tais, cawm kuv mas!”

Kwv tij hmoob sawv daws, hauv Ntawv Moo Zoo hnub no peb pom tias cov thwj tim ntshai kawg vim dej nphau nphwv tuaj nplawm lub nkoj. Thiab lawv pom Yes Xus mus ko taw saum dej ntuj. Lawv xav tias yog poj ntxoog. Lawv thiaj li ntshai kawg. Kwv tij sawv daws, hauv peb lub neej muaj ntau yam ua peb ntshai, muaj ntau yam uas peb ntxhov siab. Peb ntshai tias peb tsis muaj dab tsi noj, peb tsis muaj dab tsi nhav, peb ntshai tias peb tsis muaj nyiaj muaj ntxiag. Peb ntshai tias yuav muaj xwv txheej tshwm sim hauv peb lub neej. Muaj ntau yam uas peb ntshai. Tib neeg muaj kev ntshai os. Nej ne, nej ntshai dab tsi hauv nej lub neej?

Ntawm cov thwj tim mas, lawv kuj zoo ib yam li peb sawv daws thiab. Lawv pom Huab Tais Yes Xus ua hwj huam yee ntxwv mus ko taw saum dej ntuj, lawv thiaj ntshai kawg. Lawv tseem tsis ntseeg tias Huab Tais Yes Xus yog Tswv Ntuj Leej Tub, nws ua hwj huam yees ntxwv mus ko taw saum ntuj tau. Pob Zeb xav sim tias puas yog Huab Tais Yes Xus tiag tiag, nws thiaj nqes nkoj tso ko taw tsuj saum nplaim dej mus cuag Yes Xus. Tab sis thaum nws pom cua hlob, nws ntshai, ces nws pib tog hauv dej.

Kwv tij sawv daws, ntawm peb lub neej mas, nyob hauv txoj kev ntseeg txog Tswv Ntuj, ntseeg txog Yes Xus, muaj kev ntshai ntau yam ib txwm mas ua rau peb xyem xyav, ua rau peb tsis kam mloog Tswv Ntuj lo lus, ua rau peb tsis kam ua raws li Huab Tais Yes Xus lo lus qhia. Peb ntshai li ntawd, kuj vim rau qhov hais tias peb tsis cia siab rau Tswv Ntuj, peb tsis tshua ntseeg tiag tiag tias Huab Tais Tswv Ntuj yuav saib xyuas peb. Paub li ntawd, thov kom peb cia siab rau Tswv Ntuj tiag tiag nawj.

Thov kom peb saib ntawm cov thwj tim ua yam ntxwv rau peb. Huab Tais Yes Xus txhib cov thwj tim kom nce nkoj mus nruab nrab hiav txwv. Cov thwj tsis nce lub nkoj raws li lawv xav, tab sis mas Huab Tais Yes Xus txhib lawv kom mus. Huab Tais Yes Xus paub zoo tias yuav muaj dab tsi shwm sim ntawm cov thwj tim. Tab sis mas, nws xav sim lawv txoj kev ntseeg thiab txoj kev cia siab rau Tswv Ntuj. Lub sij hawm yav tom ntej, lawv yuav tsum tshaj Tswv Ntuj lub Moo Zoo, lawv yuav tsum coj cov neeg ntseeg, lawv yuav tsum muaj kev ntseeg ruaj ruaj tshaj dua lwm tus. Yog tsis muaj kev ntseeg li no, lawv yuav ua tim khawv txog Yes Xus tus Sawv Rov Los tau zoo li cas?

Kwv tij sawv daws, lub Moo Zoo hnub no qhia rau peb pom peb txoj kev ntseeg txog Yes Xus, peb yog Yes Xus cov thwj tim, peb kuj yuav ntsib teeb meem, yuav ntsib kev ntshai thiab, tab sis mas, peb puas ntseeg tiag tiag tias Yes Xus yog tus cawm peb, Yes Xus nyob nrog nraim peb, Yes Xus pab peb kom yeej kev ntshai tau? Peb puas ntseeg tiag tiag? Thov kom Tswv Ntuj lo lus no “Huab Tais Yes Xus, cawm kuv mas!” yog peb zaj teev Ntuj hauv hnub no.

“Huab Tais Yes Xus, cawm kuv mas!”