Hnub Chiv Tim 20 Lub 8 Hli 2023 (Sunday Homily)

Hnub chiv tim 20 lub 8 hli ntuj 2023

Hnub Hwm Mab Liab Mus Saum Ntuj

Lus Kas 1:39-56

“Koj tau koob tau hmoov tshaj ib tsoom poj niam huv si, ua cas Ntuj thiaj pub kom kuv tus Huab Tais leej niam tuaj xyuas kuv?”

Kwv tij hmoob sawv daws, hnub chiv no, lub Koom Txoos hwm Niam Mab Liab Mus Saum Ntuj. Niam Mab Liab yog Tswv Ntuj leej niam thiab lub Koom Txoos leej niam. Nws yog tus piv ntxwv rau cov neeg ntseeg sawv daws. Nws yog tus piv txwv ntawm kev tsis muab hlob, ntawm kev ntseeg thiab kev cia siab rau Tswv Ntuj. Nws ua piv txwv ntawm kev mloog Tswv Ntuj thiab ua raws li Ntuj lub siab nyiam. 

Hnub tim 1 lub 11 hli ntuj 1950, Vaj Qhia Pius kaum Ob tau tshaj tawm tias Mab Liab Mus saum Ntuj yog txoj kev ntseeg ntawm lub Koom Txoos Kas Tos Liv. Lub Koom Txoos Kas Tos Liv qhia tias Niam Mab Liab lub neej hauv lub qab ntuj no tau tiav lawm, Huab Tais Tswv Ntuj tau ua rau nws tus tsuj plig thiab lub cev mus saum Ntuj lawm. Qhov no yog peb txoj kev ntseeg. 

Niam Mab Liab yog tib neeg zoo li peb sawv daws, vim li cas nws thiaj mus saum ntuj tau?

Ib yam li kuv tau qhia, Niam Mab Liab yog tib neeg zoo li peb sawv daws, nws tsis yog Tswv Ntuj, nws tsis muaj hwj chim ua hwj huam yee ntxwv los muaj hwj chim ua ub ua no. Nws yog poj niam tsis muaj qab hau dab tsi hauv haiv neeg Israel. Tab sis mas, Tswv Ntuj nyiam nws vim tias nws tsis muab hlob, nws ua raws li Tswv Ntuj lub siab nyiam, nws yog Tswv Ntuj tus ntxhais txib zoo. Nws tsis ua txhaum. Tswv Ntuj xaiv nws los ua Leej Tub leej niam. Nws thiaj tau koob tau hmoov tshaj ib tsoom poj niam huv tib si. Txog qhov no, kuv xav tias peb sawv daws to taub lawm tias Mab Liab mus saum ntuj tau kuj vim tias nws yog Leej Tub leej niam. Thiab peb pom tias Niam Mab Liab yog tus txhawb nqa Huab Tais Yes Xus txhua yam. Muaj ntau leej mus nrhiav kev pab ntawm Niam Mab Liab, tab sis mas, Niam Mab Liab yuav coj lawv mus cuag Huab Tais Yes Xus. Ua li ntawd, txhua txhia zaus peb mus thov Niam Mab Liab pab peb, nco tsoov tias tus pub lub txiaj tsim rau peb tsis yog Niam Mab Liab, tab sis yog Tswv Ntuj tus muaj hwj huam pub lub txiaj ntsim. Niam Mab Liab yog tus pab peb thov Tswv Ntuj xwb.

Kwv tij hmoob sawv daws, thov kom Niam Mab Liab yog tus yam ntxwv rau peb hauv txoj kev ntseeg. Thov kom peb saib Niam Mab Liab thiab ua raws li nws yam ntxwv. Nws yuav coj peb mus cuag Tswv Ntuj. Nws tsob hwb Tswv Ntuj. Vim nws nyiam Tswv Ntuj tas siab tas ntsw, nws thiaj tsob hwb tib neeg, saib xyuas cov laus ib yam li Elizabeth. Vim Tswv Ntuj tsa cov neeg hauv txheej qis kom siab. Nws pub tej yam zoo rau cov neeg tshaib noj seem noj so. Niam Mab Liab nyiam Tswv Ntuj.

Thov kom peb ua raws li Niam Mab Liab. Thov kom peb cav txog Tswv Ntuj tsis tu ncua, thov peb ntseeg txog Tswv Ntuj kom ruaj mog!