NTHUAV NTAWV MOO ZOO HNUB TIM 9/2/2020

LIS PIAM 5 CAIJ NYOB NRUAB XYOOS.
Cov ntsev las lub ntiaj teb. Qhov pom kev ci rau ntiaj teb. (MT 5 : 13 - 16)
Yes Xus hais rau lawv tias : "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj ? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb.
Nej yog lub teeb ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. Hos, luag kuj tsis taws teeb coj mus zais rau hauv qab txee, luag muab txawb saum tus ncej teeb, lub teeb ci rau tas cov neeg nyob hauv tsev pom kev. Li ntawd, nej lub teeb yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj."

Kwv tij sawv daws, nyob rau hauv zaj no Huab Tais Yes Xus hais txog, cov ntsev las lub ntiaj teb thiab qhov pom kev kaj lub ntiaj teb. Ua ntej peb yuav nkag siab ob nqe lus no, peb yuav tsum to taub txog Huab Tais Yes Xus cov lus qhia nyob pem roob uas nws hais txog 8 nqe lus tus tau txoj hmoov zoo.
Uas hais txog cov tau txoj hmoov zoo yog cov txom nyem, cov quaj ntsuag, cov hlub luag tej, cov tsim thaj yeeb, cov ua raws li Huab Tais Yes Xus qhia no, yog cov tau txoj hmoov zoo, vim lawv zoo li cov ntsev las lub ntiaj teb, thiab zoo li lub teeb ci pom kev kaj rau cov nyob ib ncig.
Kwv tij sawv daws, Huab Tais Yes Xus hais tias, yog peb zoo li cov ntsev uas tsuag lawm, ces tsis muaj nuj nqe dab tsi, vim cov ntsev yog tsis daw lawm, ces kawg pov tseg rau hauv av rau neeg tsuj xwb, hos lub teeb yog tsis cig lawm, ces yeej tsis zoo dab tsi lawm thiab. Yog li ntawd, peb cov ntseeg sawv daws, peb yuav tsum tswj peb tus kheej kom peb txoj kev nseeg yuav tsum zoo li cov ntsev uas tsis txawj tsuag, thiab lub teeb uas cig tsis txawj tuag. Mas peb thiaj yuav coj tau Tswv Ntuj txoj kev pom kev kaj lub ntiaj teb.

Tus nthuav : XH. Xyooj Tuam Lis, Zoo Tswv Zov Yaj