Hnub Chiv Tim 27 Lub 8 Hli 2023 (Sunday Homily)

Hnub Chiv tim 27 Lub 8 Hli Ntuj 2023

Mas Tais 16:13-20

“Nej ne, nej hais tias kuv yog leej twg?”

Nyob zoo…

Lo lus nug uas Huab Tais Yes Xus nug nws cov thwj tim tseem ceeb tshaj. Vim rau qhov hais tias peb yog Huab Tais Yes Xus cov thwj tim, peb kuj yuav tsum teb lo lus nug no thiab tias ntawm peb mas, Huab Tais Yes Xus yog leej twg?

Mais Tais sau Ntawv Moo Zoo no rau cov His Xas Lais lo cov Israel. Cov His Xas Lais tab tom los tus Cawm seej, los tus Mes Xias. Lawv nrhiav tus Mes Xias los cawm lawv kom dim ntawm kev ua qhev, kom muaj kev thaj yeeb.

Mas Tais hais txog cheeb tsam ntawm Xes Ntxas Les Fis Lis Pos lo lus Mes Kas hu tias Caesarea Philippi. Nroog Xes Ntxas Les Fis Lis Pos tseem ceeb tshaj hauv Ntawv Moo Zoo zaj no. Vim nroog no yog qhov chaw uas cov teev pej kum dab nyob. Lawv teev cov Hes Las cov tswv ntuj. Cov His Xas Lais tsis mus nyob ze qhov chaw no, vim lawv ntshai tias qhov chaw no yuav ua rau lawv tsis dawb tsis huv. Luag tej yuav pom yus ib yam li ib tug neeg tsis zoo. Huab Tais Yes Xus coj nws cov thwj tim mus ntawm qhov chaw no, ces nws nug ib lo lus nug tseem ceeb tias “Luag tej, hais tias Neeg Leej Tub yog leej twg?” thiab nws nug tias “Nej ne, nej hais tias kuv yog leej twg?” 

Kwv tij zoo nyiam sawv daws, nej paub li no lawv, nej pom li cas? Nej xav li cas? Nruab nrab teb chaw pej kum dab, Pob Zeb lees ntseeg tias “Huab Tais, koj yog  Leej Pleev, yog tus Tswv Ntuj Muaj Txoj Sia Leej Tub.” Pob Zeb hais tias Huab Tais Yes Xus yog tus Tswv Ntuj Muaj Txoj Sia Leej Tub. Tus Tswv Ntuj Muaj Txoj Sia, lo lus no muaj lub ntsiab tseem ceeb tshaj. Vim tias hauv cheeb tsam ntawm Xes Ntxas Les Fis Lis Pos yog cov teev pej kum dab nyob. Cov Hes Las lawv cov tswv ntuj nyob ntawm no yog cov tswv ntuj tsis muaj txoj sia lawm. Lawv tsis yog cov tswv ntuj ntawm txoj sia tab sis yog cov tswv ntuj ntawm kev tuag. Ntawm Huab Tais Yes Xus mas, tsis yog li ntawd. Ib yam li Pob Zeb lees, Yes Xus yog tus Tswv Ntuj Muaj Txoj Sia Leej Tub. Huab Tais Tswv Ntuj pub txoj sia. Nws xav tshaj tawm kom sawv daws paub tias muaj Tswv Ntuj Tib Leeg xwb yog Huab Tais Leej Txiv muaj hwj huam tag nrho loj dua lwm tug, dua lwm cov dab.

Kwv tij hmoob sawv daws, yog peb lees los tawm peb lub siab lub tswv yim tiag tiag tias Huab Tais Yes Xus yog Tswv Ntuj, peb kuj txoj hmoov zoo lawm. Peb txoj hmoov zoo kuj vim rau qhov hais tias “Huab Tais Leej Txiv qhia peb kom paub, kom lees Huab Tais Yes Xus. Peb txoj hmoov zoo kuj vim tias Tswv Ntuj ua kom peb ntseeg txog Tswv Ntuj peb thiaj teev Ntuj txhua txhia hnub. Kev lees ntseeg Huab Tais Yes Xus hauv peb lub neej yog ib qho tseem ceeb tshaj. Nyob hauv peb lub teb chaw, peb pom tias niaj hnub no, muaj kev ntseeg ntau yam ua peb xyem xyav, muaj cov dab cov tswv ntuj ntawm tiam neeg no ua rau peb txoj kev ntseeg txog Tswv Ntuj tsis ruaj. Cov dab ntawm kev nrhiav noj nrhiav haus, cov dab ntawm nyiaj txiag, cov dab ntawm kev muaj suab muaj npe ua rau peb tsis nco qab Tswv Ntuj tus pub lub txiaj tsim rau peb kom peb muaj txoj sia.

Ua li ntawd, kwv tij sawv daws, thov peb mloog Tswv Ntuj lo lus hnub no thiab nyob twj ywm xav tswv yim me ntsis teb lo lus nug tias “ntawm kuv mas, Yes Xus yog leej twg?” Thov Tswv Ntuj foom koob foom hmoov rau peb txhua leej txhua tus.