Zaj nyeem hnub tim 1 lubs 9 hli 2023 (Daily reflection)

ZAJ NYEEM HNUB TIM 1 LUB 9 HLIS, HNUB RAU LUB LIS PIAM 21 CAIJ NYOB NRUAB XYOO

COV LUS NYOB HAUV MAS TAIS NTAWV MOO ZOO (MT 25: 1-13)

Kwv tij Hmoob sawv daws, lub Moo Zoo hnub no mas nej nquag hnov nyob hauv lub caij muaj ib lub ntees pam tuag, vim yog ib zaj zoo coj los ntuas peb sawv daws cov tseem muaj txoj sia nyob kom ua neeg ‘xyuam xim’, ua neeg tsim koob hmoov tseg xws li cov niam txais ntsuab npaj cov roj nrog lawv mus tos nraug vauv.

Kwv tij, tus neeg xyuam xim yog tus zoo li ntawd, nws ua dab tsi kuj xij, nws yuav xav tom ntej tom qab, nws yuav saib kom zoo tso nws mam ua.

Nyob hauv peb txoj sia kuj yog zoo li ntawd; txij hnub peb tawm plaws hauv peb niam plab los, mas peb zoo li tus niam txais ntsuab tos tus nraug vauv tuaj ua tshoob. Yog thaum tus nraug vauv tuaj txog, peb tseem nyob tos nws, mas peb yuav tau nrog nraug vauv chaw mus hauv lub tsev ua tshoob; tab sis yog thaum nraug vauv tuaj txog, peb tsis nyob ntawd ces peb yuav plam rooj tshoob no thiab peb tseem yuav raug kaw qhov rooj nyob nraum zoov thiab.

Lub caij nraug vauv tuaj kuj yog lub caij peb lub cev rov lwj mus ua av, tshuav peb tus ntsuj plig saib yuav mus nyob rooj teb twg. Nrog Huab Tais Yes Xus chaws mus hauv Ntuj Ceeb Tsheej, los yuav poob rau dab phem teb chaws.

Kwv tij, tej tus tos luv, tej tus tos ntev. Tab sis muaj ib yam zoo tib yam; yog sawv daws nqa ib lub teeb thiab ib lub hwj ntim roj. Peb yuav xaiv saib peb yuav npaj roj ntim hauv lub hwj mus kom ntau txaus, los peb yuav tsis npaj roj cia.

Kwv tij Hmoob sawv daws, hnub no peb ntseeg txog Yes Xus, peb ua Huab Tais Yes Xus thwj tim lawm, cov roj peb yuav ntim mas yog ua cov hauj lwm raws li Huab Tais Yes Xus kom peb ua; yog muab Tswv Ntuj kev nyiam nyob hauv peb nthuav tawm mus kom txog luag lwm tus.

Nyob zoo sawv daws.