Zaj nyeem hnub tim 5 lub 9 hlis 2023 (Daily reflection)

ZAJ NYEEM HNUB TIM 5 LUB 9 HLI, HNUB NCO TXOG LEEJ NTSHIAB TES LES XAS NYOB NKAUS NKAS TAS

COV LUS NYOB HAUV LUS KAS NTAWV MOO ZOO (LK 4: 31-37)

Kwv tij Hmoob, thaum nej hnov lub Moo Zoo hnub no nej xav txog dab tsi? Ntawm kuv mas kuv xav txog lub Txoos Txi Ntuj hauv Hnub Chiv. Vim tias thaum peb mus koom lub Txoos, peb yuav tau mloog Tswv Ntuj Lo Lus hauv Ntawv Cog Qub Lus, cov tsab ntawv, thiab mloog Yes Xus lub Moo Zoo. Thaum mloog tas, Txiv Plig yuav los nthuav cov lus peb tau mloog ntawv rau peb, kom peb to taub tias hnub ntawd, Tswv Ntuj tab tom hais lus dab tsi rau peb.

Kwv tij, peb sawv daws yog neeg muaj txhaum, peb zoo li tus neeg raug dab tsis huv hauv lub Moo Zoo hnub no. Nws raug dab tab sis nws kuj nrog sawv daws mus hauv lub tsev txoos, nws tau mloog Huab Tais Yes Xus cov lus, nws hnov Huab Tais Yes Xus lo lus ua hauj lwm nyob hauv nws, ces tus dab thiaj tso nws tseg.

Kwv tij, txhua hnub thaum peb mus koom lub Txoos Txi Ntuj, mas peb yuav muab siab rau mloog saib Tswv Ntuj tab tom hais lus dab tsi rau peb, peb nrog Tswv Ntuj tham, peb cia Tswv Ntuj Lo Lus los hloov peb siab hloov peb lub tswv yim, kom peb rov ua tus neeg tshiab.

Cov kwv tij, tus neeg raug dab tsis huv, tsis kav Tswv Ntuj tus duab nyob hauv nws, nws thiaj muaj lub siab xav nrhiav Tswv Ntuj; txawm tus dab koos nws cia, tsis kav nyob tob tob hauv nws nruab siab mas Tswv Ntuj qhov zoo tseem ci nyob hauv; yog li nws thiaj cia Huab Tais Yes Xus cov lus nkag mus chwv nws lub tswv yim, nkag mus ntaus tsam tus dab tsis huv.

Kwv tij, txawm tias kev txhaum niaj hnub koos peb cia, tsis kav nyob hauv peb muaj Tswv Ntuj tus duab, thiab peb muaj Huab Tais Yes Xus nrog nraim peb. Mas peb yuav qhib siab cia Tswv Ntuj Lo Lus peb tau hnov nrov tuaj kom txog peb lub tswv yim xws li tus raug dab tsis huv hauv lub Moo Zoo hnub no mog.

Nyob zoo sawv daws.