Hnub Chiv Tim 3 Lub 9 Hlis 2023 (Sunday Homily)

Hnub Chiv Tim 3 Lub 9 Hlis Ntuj 2023
Lub cail Nyob Nruab Xyoo 
Mas Tais 16:21-27

“Yog leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab.”
Nyob Zoo…
Kwv tij hmoob sawv daws, lub Moo Zoo nej mloog hauv hnub no mas yog zaj tom qab Pob Zeb lees ntseeg tias Yes Xus yog Leej Pleev, yog tus Tswv Ntuj Muaj Txoj Sia Leej Tub. Huab Tais Yes Xus yog tus Cawm Seej los Mes Xias. Txij hnub ntawd los, Yes Xus pib qhia rau cov thwj tim paub tias tus Mes Xias txoj kev cawm neej yuav xaus zoo li cas. Nyob ntawm Yes Lus Xas Les, Yes Yus yuav raug tsim thiab yuav raug muab nws tua, ces hnub peb nws yuav sawv rov los. Hnov li ntawd mas, cov thwj tim txais tsis tau, Pob Zeb ua sawv daws chaw nroo rau Yes Xus tias lawv tsis pub kom tej yam ntawd tuaj raug Yes Xus. Huab Tais cem Pob Zeb me ntsis thiab nws hais tias “Koj thaiv kuv kev. Vim qhov koj xav, tsis yog qhov Tswv Ntuj xav, yog tej yam neeg xav xwb.”
Kwv tij hmoob, txog qhov no, nej xav li cas? Tej zaus, peb tsis to taub Tswv Ntuj txoj kev, ntau zaus, peb tsis nkag siab tias Tswv Ntuj lub siab nyiam yog dab tsi? Tej zaus, peb tsis yog tus ua raws li Tswv Ntuj lub siab yam, tsis xis Tswv Ntuj siab. Qhov peb ua los qhov peb xav yog tej yam neeg xav xwb. Ntau zaus, peb thaiv Tswv Ntuj txoj kev. Thov kom peb nquag teev Ntuj, nquag thov Ntuj tsis tu ncua kom peb to taub Tswv Ntuj txoj kev.
Huab Tais Yes Xus lo lus qhia hnub no muaj zog kawg. Tswv Ntuj lo lus hnub no tshoj peb lub siab kom paub tias leej twg xav cawm nws txoj sia, mas nws yuav plam nws txoj sia. Hos leej twg plam nws txoj sia vim Tswv Ntuj tas siab tas ntsws, mas nws yuav rov tau nws txoj sia. Huab Tais Yes Xus caw peb kom niaj hnub nrauj yus tus kheej, muab txoj sia pab lwm tus, ua tej yam muaj qab hau rau luag tej.
Yog ib tug neeg txeeb tau tas lub ntiaj teb huv tib si los ua nws tug, tab sis yog nws txoj sia ploj lawm, mas nws tau dab tsi los pauv tau nws txoj sia? Kuv xav tias lo lus qhia no muaj zog tshaj. Thov caw kwv tij sawv daws xav tswv yim txog lo lus qhia no kom zoo mog. Dhau zaj no Huab Tais Tswv Ntuj muaj tej yam hais rau peb kom paub Nws txoj kev. Nyob zoo sawv daws.