Zaj nyeem hnub tim 9 lub 10 hli 2023 (Daily reflection)

ZAJ NYEEM HNUB TIM 9 LUB 10 HLI, HNUB NCO TXOG LEEJ NTSHIAB DAWS NIS

COV LUS NYOB HAUV LUS KAS NTAWV MOO ZOO (LK 10: 25-37)

Kwv tij Hmoob sawv daws, peb yuav ua dab tsi kom tau txais txoj sia nyob mus li? 

Lo lus no yog lo lus tus kws lij choj nug Huab Tais Yes Xus. Tej zaus nyob hauv peb mas peb kuj xav li tus kws lij choj no thiab.

Thaum peb muaj tej lo lus li no txhawv hauv peb siab tuaj, mas peb kuj yuav teb xws li tus kws lij choj teb rau Huab Tais Yes Xus tias “Yog kom kuv tau txais txoj sia nyob mus li, mas kuv yuav ua 2 yam no: yog nyiam Huab Tais Tswv Ntuj tas siab tas ntsws, tas nrho kuv tus ntsuj plig, kuv lub zog, kuv lub tswv yim; qhov ob tuaj mas kuv yuav nyiam tus nyob ze kuv li kuv nyiam kuv ntag.”

Yog kawg, cov kwv tij, thaum peb nyiam Huab Tais Yes Xus thiab nyiam tus nyob ze peb, mas peb yuav tau txais txoj sia nyob mus li tom qab peb tso lub ntiaj teb no tseg.

Tab sis, tus neeg twg thiaj yuav yog tus nyob ze peb? Puas yog peb niam peb txiv, los peb cov kwv tij koom ib plab, koom ib caj ces, los yuav yog peb tej me tub me nyuam?

Hnub no Huab Tais Yes Xus thiaj hais ib zaj ua piv txwv txog tus nyob ze peb, yog zaj tus Xas Mas Lias siab zoo li nej tau hnov ntawd.

Thaum hais tas, Huab Tais Yes Xus nug tus kws lij choj tias “Raws li koj xav, tus twg yog tus nyob ze tus neeg raug xwv txheej ntawd?”

Tus kws lij choj teb tias “Yog tus uas tau khuv leej tus raug mob.”

Cov kwv tij, tus nyob ze peb yog tus khuv leej peb, hlub peb ces nws nyiam peb. Tus nyob ze peb yog tus neeg raug txom nyem. Tus nyob ze peb yog txhua tus neeg nyob ncig peb, vim sawv daws nyias muaj nyias ib qho txom nyem, nyias muaj nyias xwv txheej.

Yog li Huab Tais Yes Xus thiaj hais rau tus kws loj choj tias “Koj twb paub lawm tias tus nyob ze koj yog tus tug, mas koj mus, koj ua zoo li tus Xas Mas Lias siab zoo ntawd.”

Kwv tij Hmoob, peb kuj yuav ua zoo li Huab Tais Yes Xus lo lus hauv hnub no, “Mus, hlub thiab khuv leej cov neeg koj tau ntsib nyob hauv koj lub neej.”

Nyob zoo sawv daws.