Zaj nyeem hnub tim 12 lub 10 hli 2023 (Daily reflection)

ZAJ NYEEM HNUB TIM 12 LUB 10 HLI, HNUB TSIB LUB LIS PIAM 27 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 11: 5-13)

Kwv tij Hmoob, thaum muaj ib tug neeg tuaj thov ib yam dab tsi ntawm nej, piv li nws tuaj thov txais nej nyiaj; nej puas yuav pub rau nws. Yog ib yam me me mas nyaj nej yuav pub, tab sis yog ib yam loj mas ntshe nej yuav tsis tshua zoo pub. Tab sis yog tus neeg ntawd pheej taij tas zog, mas thaum nej meem txom; nej kuj yuav pub vim nej tiv tsis tau nws cov lus taij, los nej tej tug haj yam tsis kam pub. Puas yog?

Tab sis ntawm Tswv Ntuj mas tsis zoo li ntawd. Tswv Ntuj yog peb Txiv, nws yuav mloog peb cov lus thov lus taij, thiab nws yeej yuav pub qhov zoo tshaj rau peb. 

Nej cov ua niam ua txiv, mas nyaj nej yuav to taub zoo txog leej niam leej txiv lub siab hlub nkawd cov me nyuam. Ib yam li hnub no Huab Tais Yes Xus hais tias “Nyob hauv nej, leej txiv twg yog nws tus tub taij ib tug ntses, nws puas muab ib tug nab rau. Leej txiv twg yog nws tus tub taij ib lub qe, nws puas muab ib tug kab lij tshooj rau. Leej txiv kawg yuav pub ntses los qe rau nws tus me nyuam.”

Yog vim li no mas Huab Tais Yes Xus thiaj hais tias “Ntawm nej, mas nej kav tsij thov, kav tsij nrhiav, thiab kav tsij khob nej Txiv lub qhov rooj ntag. Yog nej tsis thov, tsis nrhiav, thiab tsis khob, mas nej Txiv puas yuav pub rau nej; nej puasyuav tau ntsib, thiab puas yuav qhib qhov rooj rau nej mas!”

Kwv tij Hmoob sawv daws, peb twb paub tias Huab Tais Tswv Ntuj yog peb Txiv, mas peb kav tsij thov ntag. Peb paub tias peb Leej Txiv muaj txiaj ntsim ntau rau peb, mas peb kav tsij nrhiav ntag. Peb paub tias peb lub tsev yuav nyob mus li yog Ntuj lub Ceeb Tsheej, mas peb kav tsij khob ntag.

Tab sis, thaum peb tsis tau raws li thov, peb tsis ntsib raws li nrhiav, los tsis muaj tus qhib qhov rooj rau peb; mas tsis yog Tswv Ntuj tsis hlub peb tsis nyiam peb. Tswv Ntuj yog peb Txiv, nws hlub peb tshaj plaws, nws yuav muab qhov zoo tshaj rau peb, zoo dua yam peb thov, zoo dua qhov peb nrhiav. 

Huab Tais Yes Xus hais tias “Leej Txiv yuav pub Leej Ntuj Plig Ntshiab rau nej.”

Kwv tij, thaum Tswv Ntuj pub Leej Ntuj Plig Ntshiab rau peb, mas peb yuav tau txais 7 lub txiaj ntsim no: kev thoob tsib, lub tswv yim, kev txawj xav, rab peev xwm, lub laj lim, siab ruaj nreb, thiab paub hwm Ntuj.

Nyob zoo sawv daws.