Zaj nyeem hnub tim 14 lub 10 hli 2023 (Daily reflection)

ZAJ NYEEM HNUB TIM 14 LUB 10 HLI, HNUB NCO TXOG LEEJ NTSHIAB VAJ QHIA KAS LIS TUS IB

COV LUS NYOB HAUV LUS KAS NTAWV MOO ZOO (LK 11: 27-28)

Cov kws tij Hmoob, lub Moo Zoo hnub no yog ib qib luv luv xwb. Tab sis yog qib lust seem ceeb kawg. 

Thaum luag tej hais tias tos Huab Tais Yes Xus ua hwj huam ntiab tau dab tsis huv, vim Huab Tais Yes Xus vam txog tus vaj dab tsis huv los ua cov hauj lwm ntawd. Tab sis ib tug poj niam nyob hauv tsoom sid tsa suab hais tias “Lub plab uas tau nqa koj thiab lub xub ntiag uas pub mis rau koj tau txoj hmoov zoo!”

Nws tsa suab hais li ntawd, vim nws tsis xav li zeej tsoom xav, nws xav thiab ntseeg tias Huab Tais Yes Xus tsum yog tus tuaj ntawm Tswv Ntuj tuaj, Huab Tais Yes Xus thiaj muaj zog dua cov dab tsis huv, ces nws thiaj pom tias tus poj niam xeeb Huab Tais Yes Xus mas ua cas yuav tau txoj hmoov zoo ua luaj. Tus poj niam xeeb Huab Tais Yes Xus mas muaj hmoo tshaj ib yeej tsoom poj niam His Xas Lais huv tib si, vim cov poj niam His Xas Lais txhua tus puav leej tos ntsoov saib lawv puas yog tus Tswv Ntuj xaiv los pab Tswv Ntuj txoj hauj lwm cawm neeg xws li Tswv Ntuj tau cog lus nrog lawv cov yawg koob.

Thaum Huab Tais Yes Xus hnov tus poj niam no cov lus, Huab Tais Yes Xus xav qhia nws tias tsis yog tus xeeb Huab Tais Yes Xus thiab tu Huab Tais Yes Xus xwb thiaj yuav yog tus muaj txoj hmoov zoo. Tab sis tus neeg twg tau mloog Tswv Ntuj Lo Lus thiab coj mus ua raws mas tus neeg ntawd yuav tau txoj hmoov zoo loj dua.

Huab Tais Yes Xus cov lus yog lus tseeb, yog li thaum peb mloog Tswv Ntuj Lo Lus tawm hauv Huab Tais Yes Xus lub ncauj tas, peb khaws coj mus ua raws, mas peb yuav yog tus tau txoj hmoov zoo loj. 

Li ntawd, tag kis yuav yog Hnub Chiv uas peb sawv daws sib txoos mus mloog Tswv Ntuj Lo Lus ua ke, mas thov kom peb muab siab mloog saib Tswv Ntuj hais dab tsi, Tswv Ntuj xav kom peb ua dab tsi nyob hauv lub lis piam. Ces peb khaws coj mus ua raws li Tswv Ntuj hais rau peb mog.

Nyob zoo sawv daws.