Zaj nyeem hnub tim 17 lub 10 hli 2023 (Daily reflection)

ZAJ NYEEM HNUB TIM 17 LUB 10 HLI, HNUB NCO TXOG LEEJ NTSHIAB IS NYAS XYUS NYOB AS NTHIAS KIAS

COV LUS NYOB HAUV LUS KAS NTAWV MOO ZOO (LK 11: 37-41)

Kwv tij Hmoob sawv daws, lub Moo Zoo hnub no hais tias muaj ib tug Fas Lis Xais caw Huab Tais Yes Xus mus noj mov hauv nws tsev, ces nws pom tias Huab Tais Yes Xus tsis xub ntxuav tes ua ntej tso mam noj mov, ces nws poob siab.

Kwv tij, tos tus Fas Lis Xais poob siab, tsis yog vim nws ntshai tsam Huab Tais Yes Xus txhais tes khib liab ces thaum noj mov yuav ua rau Huab Tais Yes Xus lub cev muaj mob; qhov tus Fas Lis Xais poob siab, mas ib txwm cov Yus Das yeej muaj txoj cai tias yuav tsum ntxuav tes ua ntej mam noj mov.

Yog peb muab xav raws li lub ntuj kev kawm nyem no, mas yeej yog kawg uas yuav tsum xub ntxuav tes ua ntej mam noj mov. Tab sis lub Moo Zoo tsis yog qhia peb li ntawd xwb, tiam sis lub Moo Zoo hnub no lub ntsiab mas yog Huab Tais Yes Xus cov lus no: “Nej zoo li ntawd, nej ntxuav khob ntxuav phaj sab nraud kom huv, tab sis muaj kev tub sab thiab kev phem nyob hauv nej sab hauv.” 

Kwv tij, peb tsis paub tias tus Fas Lis Xais no tus cuj pwm zoo li cas, tab sis peb ntseeg tias Huab Tais Yes Xus tsom tau hauv neeg lub siab, ces tej zaum Huab Tais Yes Xus paub tias tus Fas Lis Xais no yog ib tug neeg zoo li cas; tej zaum nws yuav yog ib tug Fas Lis Xais nyiam dag luag tej kom tau yuav luag tej li cuab tam, mas Huab Tais Yes Xus thiaj txhob txwm tsis ntxuav tes kom tau chaw ntuas nws tig los yuav lub siab tshiab. Huab Tais Yes Xus thiaj hais cov lus ntuas rau nws tias “Phim koj yuav muab yam koj muaj pub rau luag, ces txhua yam yuav huv rau koj.”

Kwv tij Hmoob sawv daws, Huab Tais Yes Xus cov lus no puas yog hais rau tus Fas Lis Xais ntawd xwb? Tsis yog.

Huab Tais Yes Xus tseem tab meeg hais rau peb sawv daws thiab.

Peb txhob xav tias peb yog ib tug neeg zoo txhij lawm, vim tias txij thaum peb xeeb los mas nyob hauv peb yeej muaj ib qhov txhaum xeeb nrog peb, qhov txhaum ntawd loj hlob nrog peb ua ke, ua li mas peb yim muaj hnub nyoog thiaj yim muaj ib lub siab ib mus rau qhov phem qhov tsis zoo. Yog li Huab Tais Yes Xus thiaj ntuas peb kom xyaum pub tej yam peb muaj rau lwm tus, mas thiaj yuav ntxuav tau peb lub siab kom huv, hloov tau peb tus cuj pwm kom nyiam ua qhov zoo.

Nyob zoo sawv daws.