Zaj nyeem hnub tim 19 lub 10 hli 2023 (Daily reflection)

ZAJ NYEEM HNUB TIM 19 LUB 10 HLI, HNUB NCO TXOG LEEJ NTSHIAB PAJ LUG NYIAM NTOO CUAM

COV LUS NYOB HAUV LUS KAS NTAWV MOO ZOO (LK 11: 47-54)

Kwv tij Hmoob, hnub no tos nej hnov Huab Tais Yes Xus hais ib cov lus tsawm neeg zoo li ntawd, vim tias Huab Tais Yes Xus pom cov Fas Lis Xais thiab cov Kws Lij Choj lawv nyiam muab txoj cai thiab lawv tej kab ke los yuam tsoom pej xeem kom ua raws, tab sis lawv twb yog cov paub yog cov tau kawm, lawv ho tsis ua raws. Yog li mas Huab Tais Yes Xus thiaj tab meeg hais lus tsawm lawv. 

Huab Tais Yes Xus hais rau lawv tias “Vim li ntawd, tiam neeg no yuav tsum ris lub txim them cov yaj saub tej ntshav uas tau nchuav txij thaum ntuj tsim teb raug los.”

Kwv tij, cov yaj saub yog cov neeg Tswv Ntuj tshoj lawv kom sawv los qhia Tswv Ntuj txoj cai rau tsoom neeg sawv daws, coj Tswv Ntuj lo lus tuaj hais qhia sawv daws, tab sis yog peb saib cov His Xas Lais cov liv xwm, peb yuav pom tias muab ntau tus yaj saub raug lawv muab tsim txom, muab tua. Tom qab no lawv paub tias tus neeg ntawd yog Tswv Ntuj tus yaj saub mas lawv mam hais lus qhuas txog. 

Kwv tij, vim txij lub hauv paus los, neeg tsis mloog lus, mas lub keeb txhaum thiaj poob tuaj raug lub ntiaj teb; yog li ntiaj teb neeg thiaj muaj kev txhaum, muaj kev qias, tsim nyog peb sawv daws yuav tau sib pab txhim kho, sib pab sib ntuas kom neeg rov ntshiab tuaj, kom lub ntiaj teb rov huv xws li thaum ntuj tsim teb raug.

Tseem muaj ib lo lus Huab Tais Yes Xus hais tsawm cov Kws Lij Choj, yog lo lus tias “Nej txoj hmoov phem, vim nej rho tus yawm sij qhib kev txawj ntse, tab sis nej tsis nkag mus hauv. Cov xav nkag mus hauv, los nej tsis pub lawv nkag.”

Lo lus no yog lo lus peb yuav muab khaws coj mus xav. Peb cov tau kawm Ntuj kev cai, tau txais lub Cim Ntxuav, mas zoo li peb yog tus tau rho tus yawm sij qhib kev txawj ntse mus. Hnub no, peb puas ua neeg cuaj khaum, ua tus qia dub tsis qhib qhov rooj cia lwm tus tau chaws mus hauv kem tsev khaws kev txawj ntse, peb puas tau hais tej lo lus, ua tus yeeb yam thaiv tsis pub peb cov kwv tij tsis tau paub Ntuj kev cai los paub txog Tswv Ntuj.

Kwv tij, peb yuav coj mus xav mog.

Nyob zoo sawv daws.