Zaj nyeem hnub tim 25 lub 10 hli 2023 (Daily reflection)

ZAJ NYEEM HNUB TIM 25 LUB 10 HLI, HNUB PLAUB LUB LIS PIAM 29 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 12: 39-48)

Cov kwv tij Hmoob, lub Moo Zoo hnub no yog txuas zaj nag hmo. Nag hmo peb hais tias peb tsis paub thaum twg thiaj yog lub caij Tswv Ntuj hu peb rov qab, yog li mas peb kav tsij ua cov hauj lwm zov hmo ziag no mus.

Hnub no Huab Tais Yes Xus hais dua ib zaj paj lug ntuas peb kom ua neeg pheej xeeb thiab xyuam xim vim peb twb tau paub Tswv Ntuj lub siab lawm.

Cov kwv tij, tus tub txib pheej xeeb thiab xyuam xim, nws yuav rau siab ua cov hauj lwm nws tus tswv txib kom nws ua. Yog peb xav ua ib tug neeg pheej xeeb rau Tswv Ntuj mas peb kuj yuav rau siab ua cov hauj lwm Tswv Ntuj tos ntawm peb, yog peb xav ua tus neeg xyuam xim mas peb kuj yuav nquag ua qhov zoo kom txia ua ib tug cuj pwm nyob hauv peb mus li. 

Kwv tij, tus neeg twg pheej xeeb thiab xyuam xim, mas sawv daws tso siab rau nws. Tab sis muaj ib yam peb yuav tau ceev faj tsam ntev thiab ntev mus ces peb tub nkeeg, tsam peb lub tswv yim xav tias txhob maj, ces peb tsis nco qab ua qhov zoo, ua cov hauj lwm luag tej tso siab rau peb ua.

Kwv tij Hmoob, Tswv Ntuj tsim peb los tsob hwb Tswv Ntuj, peb tsob hwb Tswv Ntuj tau mas yog peb ib tug rov tsob hwb ib tug, ib tug nyiam ib tug, ib tug pab ib tug; Tswv Ntuj tso siab li ntawd rau peb.

Tab sis raws li lub hauv paus mas vim neeg tsis mloog Tswv Ntuj, neeg mus mloog dab phem ntxias, neeg mloog neeg lub siab ntshaw, ces neeg thiaj muaj txhaum. Yog li mas cov kwv tij, peb yog ib tug me nyuam neeg me me tsis muaj zog tiv tau dab phem kev haub kev ntxias peb siab, mas peb thiaj yuav thov Tswv Ntuj ntxiv lub zog rau peb, kom muaj cuab kav tiv tau dab phem kev ntxias, tiv tau peb lub siab ntshaw ua qhov phem, mas peb thiaj ua tau cov hauj lwm tsob hwb lwm tus nyob hauv kev sis nyiam sis hlub.

Kwv tij, Huab Tais Yes Xus hais tias “Yog thaum tus tswv rov los txog, nws pom tus tub txib tab tom lis nws tej num, mas tus tub txib no txoj hmoov zoo. Tus tub txib uas nws yeej paub qhov tus tswv xav kom ua tab sis nws tsis ua, mas tus tub txib ntawd yuav mag tus tswv rab nplawm ntau teg.”

Nyob zoo sawv daws.