Tus Tswv Qhia tshiab nyob Manipur thov kom nrhiav kev daws teeb meem ntawm kev kub ntxhov

Vaj Qhia Fas Ntshis Kus tsa tus Tswv Qhia Linus Neli ua tus Tswv Qhia nyob hauv lub Cheeb Koom Txoos Imphal. Nyob ntawd muaj kev kub ntxhov ntawm cov haiv neeg los tau ntau lub hlis thiab ua rau neeg tuag 200 leej. 

Tus Tswv Qhia tshiab hais tias “Peb thov Ntuj pub kev thaj yeeb rau peb, tsis yog thov tej yam kom zoo nkauj xwb, peb yuav thov kev muaj lub siab tawv ntawm Tswv Ntuj. Peb tseem nyob ze cov neeg thoj nam uas lawv raug kev kub ntxhov nyob hauv cov yeej.” Lub Cheeb Koom Txoos Imphal yog nyob hauv lub xeev Manipur, nyob Is Ntias teb. Lub Cheeb Koom Txoos raug kev kub ntxhov ntawm cov haiv neeg txij lub 5 hlis los lawm.  Nyob ntawd cov neeg feem coob yog teev hawm His Ntus thiab cov Kuki uas yog haiv neeg tsawg, lawv feem coob yog neeg ntseeg. Lawv nyob hauv cov zej zog nyob pem roob. Lawv yog cov neeg muaj feem cuam txog kev kub ntxhov. The Kuki pom tias lawv txoj kev nyob raug cov nom hauv cheeb tsam caij tsuj thiab sib txeeb av ua noj, ces thiaj ua rau muaj kev kub ntxhov thiab muaj neeg tuag ze 200 leej.

Tus Tswv Qhia tshiab yug xyoo 1957, nws ua Txiv Plig txij xyoo 1984 los lawm. Thiab nws tau tuav ntau txoj hauj lwm tseem ceeb nyob hauv lub Koom Txoos Is Ntias. 

Tswv Qhia thov kom sawv daws sib pab thov kev thaj yeeb ntawm Tswv Ntuj, kom sawv daws txawj sib koom ua ib tug thiab ua ib lub teb chaws ruaj khov. Thov kom txhua txhua lub xeev muaj zog thiab nyob vam meej kaj siab lug. Tswv Qhia tau xaiv ib lo lus nyob hauv ntawv Moo Zoo los ua paj lug tias : “Thov mloog nws”.

Vim kev mloog Tswv Ntuj cov lus thiab mloog Tswv Ntuj lub suab, xav kom cov neeg nyob Imphal tau hnov tau mloog ntau dua yag tag los.