Cov neeg ntseeg, cov Mawv Xis Lim thiab cov His Ntus tawm los khaj cai nyob hauv lub tuam ceeb Dhaka

Cov neeg ntseeg, cov Mawv Xis Lim thiab cov His Ntus tawm los khaj cai nyob hauv lub tuam ceeb Dhaka, lawv tawm tsam txog kev tua ib tug kws sau paj lug. Kev kub ntxhov hais txog cov haiv neeg tsawg thiab kev teev hawm tseem muaj ntxhov quav niab tsis tseg nyob Npees Las Des teb. 

Cov xwm txheej zaum kawg, yog tus kws sau paj lug nto npe hu ua Radhapada Roy uas nws muaj 80 xyoo, raug coj mus hauv tsev kho mob. Tsoom pej xeem uas zwm rau fab kab lis kev cai Npees Las Des thiaj tawm los taij thov kev ncaj ncees. Nyob hauv pab neeg khaj cai ntawd kuj muaj cov neeg ntseeg, cov Mawv Xis Lim thiab cov His Ntus nrog lawv koom ua ib lub siab.

Lawv sib sau ze ntawm 100 leej nyob hauv lub tshav puam Shahbagh Generation Square nyob tuam ceeb Dhaka, los taij thov kev ncaj ncees rau tus kws sau paj lug His Ntus uas nto npe. Hnub tim 30 lub 9 hlis tag los no, Radhapada Roy raug ib tug txiv neej Mawv Xis Lim ntaus nyob hauv lub zos Madhaikhal, uas yog lub zos nyob toj siab sab pej hauv Npees Las Des teb. 

Nod yog ib qho ua phem kawg rau cov haiv neeg tsawg thiab cov kev teev hawm nyob hauv lub teb chaws. Feem coob yog cov neeg ntseeg thiab cov His Ntus uas lawv tsis tshua raug txim. Tsis ntev los no muaj kev tshaj tawm tias muaj kev kub ntxhov ntau zaug rau cov neeg nyob hauv fab kab lis kev cai, xws li tus kws sau paj lug uas nto npe. Thaum nws tab tom nuv ntses nyob ze ntawm nws lub tsev, tab sis ib pliag ntshis xwb nws tus kwv Kadur Rahman cia li xuas qws ntaus nws taub hau yam tsis txuag siav. Ces sawv daws thiaj coj nws mus kho nyob hauv tsev kho mob.  

Jugal Roy uas yog nws tus tub hais rau cov tub ceev xwm tias : 6 lub hlis dhau los, nws txiv thiab Rafiqul Islam nkawd tau sib ceg ib cuam. Lawv yog nyob ua ke ib zog. Cov xwm txheej no ua kev ceeb ntshai rau tsoom tub ua yeeb yam nyob Npees Las Des, ces ntau leej tub ua yeeb yam thiab tub ntaus paj nruag thiaj sib sau kom tau tawm tsam hais txog kev ua phem rau Radhapada Roy.