Zaj nyeem hnub tim 9 lub 11 hlis 2023 (Daily reflection)

ZAJ NYEEM HNUB TIM 9 LUB 11 HLIS, HNUB CEV LUB TUAM TSEV LAS TES LAAS
COV LUS NYOB HAUV ZAM NTAWV MOO ZOO (Z 2: 13-22)

Kwv tij Hmoob, hnub no ua hmoov cev lub Tuam Tsev Teev Ntuj Las Tes Laas rau Tswv Ntuj. Lub tsev teev Ntuj no yog lub tuam tsev loj tshaj plaws nyob hauv tuam ceeb Los Mas, yog lub tuam tsev Vaj Qhia ua tus tswj, yog lub tuam tsev niam hauv txhua lub tsev teev Ntuj tag nrho thoob ntiaj teb.
Nyob hauv hnub no peb hnov lub Moo Zoo yog hais txog thaum Huab Tais Yes Xus ntiab cov tub luam tawm hauv lub Tuan Tsev Teev Ntuj nyob Yes Lus Xas Les, vim tias lub Tuam Tsev Teev Ntuj yog Tswv Ntuj thaj chaw ntshiab tab sis cov Yus Das muab ua chaw ua lag luam nrhiav nyiaj, yog yam tsis haum rau Tswv Ntuj.
Kwv tij Hmoob sawv daws, peb lub cev los yeej yog thaj chaw cia rau Tswv Ntuj nyob thiab. Yog li mas tsim nyog peb yuav ntxuav, yuav tshem tej kev phem kev qias tawm hauv peb lub cev, kom peb lub cev no ua chaw ntshiab cia rau Tswv Ntuj nyob. Peb yuav thov Huab Tais Yes Xus tuaj ntiab txoj kev phem hauv peb tawm mus xws li hnub no Huab Tais Yes Xus tau ntiab cov tub luam hauv lub Tuam Tsev Teev Ntuj. 
Nyob zoo sawv daws.