Zaj nyeem hnub tim 17 lub 11 hlis 2023 (Daily reflection)

ZAJ NYEEM HNUB TIM 17 LUB 11 HLIS, HNUB NCO TXOG LEEJ NTSHIAB ES LIS XAS NPES NYOB HOOS NQIAS

COV LUS NYOB HAUV LUS KAS NTAWV MOO ZOO (LK 17: 26-37)

Kwv tij Hmoob, Huab Tais Yes Xus qhia tias Neeg Leej Tub lub zim txwv zoo li cov xwm tshwm hauv Nos Hes thiab Los lub zim txwv. Qhov no Huab Tais Yes Xus xav txog nws lub caij hla hauv lub ntiaj teb no rov mus cuag Tswv Ntuj, thiab peb lub caij.

Cov thwj tim nyob luag ntxhi, lawv zoo siab thiab xav tias Huab Tais Yes Xus yuav sawv ua tus coj lawv ntaus tsam cov Los Mas, Huab Tais Yes Xus yuav ua lawv tus vaj nyob ntiaj teb no, ces sawv daws yuav muaj koob nto moo. Tab sis tib pliag xwb lawv coj kev npau suav yaj ntshis, txhua yam tsis zoo li lawv xav thiab ntshaw, qhov lawv pom yog Huab Tais Yes Xus raug ntes, raug khi thiab muab hlua plawm, Huab Tais Yes Xus tseem raug ntsia thiab tuag txom nyem ntsuav saum Nto Cuam.

Peb txoj sia kuj yuav zoo li ntawd, peb ntsia tsis pom tias ib me ntsis ntxiv yuav zoo li cas, tag kis peb puas tseem pom cov swm neeg ntxiv. Qhov peb paub mas yog muaj ib hnub peb yeej yuav ncaim lub ntiaj teb no mus xws li Nos Hes paub tias muaj ib hnub mas dej yuav nyab lub ntiaj teb, xws li Los paub tias lub nroog Xos Dos Mas yuav raug hlawv.

Kwv tij Hmoob, Huab Tais Yes Xus tsis xav kom peb txhawj txog yav tom ntej, Huab Tais Yes Xus xav kom peb npaj hnub no kom txhij, ua lub neej hnub no kom zoo tosh nub yuav tuaj txog zoo li Nos Hes paub tias muaj ib hnub dej yuav nyab lub ntiaj teb ces nws npaj txua lub nkoj raws li Huab Tais Ntuj hais. 

Kwv tij. Peb txhob ua zoo li Los tus poj niam, uas khuv xim ntiaj teb lub cuab tam, nws thiaj tig ntsia rov tom qab ces qhov kawg nws raug xwv txheej.

Kwv tij, qhov yuav pab kom peb hla tau lub ntiaj teb no mus yam kaj siab lug, mas tsuas yog ua raws li Tswv Ntuj lo lus hais rau peb xwb. 

Nyob zoo sawv daws.