Is Laas kaw 2 tug tub xov xwm, vim nkawd npog Amini txoj kev tuag

Lub tsev txiav txim nyob Is Laas teb tshaj txog kev txiav txim muab ob tug tub xov xwm poj niam kaw, tom qab tsaib no uas Amini tuag. Amini txoj kev tuag, mas ua rau tsoom pej xeem tawm tsam thoob lub teb chaws. 

Mohammadi uas nws muaj 36 xyoo thiab Hamedi uas muaj 31 xyoos, nkawd raug txiav txim tias nkawd koom tes nrog As Mes Lis Kas uas yog Is Laas tus yeeb ncuab. Nyob hauv kev txiav txim, mas Mohammadi raug txiav txim kaw nkuaj 6 xyoo, hos Hamedi raug txiav txim kaw nkuaj 7 xyoo. Tsis tas li ntawd, nkawd tseem raug kaw nkuaj 5 xyoos los ntawm kev tiv thaiv kev ruaj ntseg hauv lub teb chaws thiab. 

Mohammadi yog tub xov xwm ntawm Ham Mihan, hos Hamedi yog tus neeg thau duab nyob hauv tsab ntawv xov xwm Shargh. Nkawd raug kaw nyob hauv lub nkuaj Evin uas nyob Tehran txij lub 9 hlis tsaib no los lawm. Tab sis nkawd lub txim nyuam qhuav raug muab coj los nce tsev txiav txim lub 5 hlis xyoo no xwb. 

Hamedi raug ntes ib lis piam tom qab Amini tuag, yog thaum Amini raug mob hnyav thiab lawv coj nws mus hauv tsev kho mob, ces Hamedi lawv qab mus saib. Nws tso cov duab hais txog Amini tsev neeg tab tom muaj kev tu siab tawm nyob hauv Social Media, ces nws thiaj raug ntes. Hos Mohammadi raug ntes tom qab nws mus hauv lub nroog Saqez uas yog lub nroog Amini yug los, nyob hauv lub xeev Kurdistan uas nyob Is Laas sab hnub poob. Nws tsis kam qhia txog Amini lub ntees tuag, ces thiaj muaj kev tawm tsam loj. Hamedi thiab Mohammadi nkawd raug muab faib txiav txim, thiab tej zaum kuj thov zam txim tau. 

Thaum lub 8 hli, xov xwm Is Laas tshaj tias : cov tub ceev xwm Is Laas tau ntes tshaj 90 tus tub xov xwm suav txij hnub muaj kev tawm tsam los ntawm Amini txoj kev tuag nyob hauv ntau lub nroog thoob teb chaws.