ACN thov kev pab rau cov neeg ntseeg uas raug hiam nyob Pas Kis Taas teb

Aid to the Church in Need (ACN) yog lub Koom Haum ua cov hauj lwm tshaj Ntuj Lus Kav Tos Liv hauv txhua txhua lub teb chaws, tau cev daim ntawv thov kev pab cov neeg ntseeg nyob Pas Kis Taas teb, uas lawv tab tom khiav kom dim txoj sia. 

ACN nyob hauv qhov chaw muaj xwm txheej tshwm sim thiab yuav pab lub Koom Txoos raws li pab tau. Thov pab peb raws li qhov peb pom tam sim no, vim peb cov kwv tij neeg ntseeg nyob Pas Kis Taas teb tab tom raug hiam. 

Lub Koom Haum ACN hais cov lus no hnub tim 18 lub 8 hli. Kev cev daim ntawv thov kev pab yog tom qab uas ib pab txiv neej Mawv Xis Lim pua tawm leej hlawv cov tsev teev Ntuj thiab hlawv cov neeg ntseeg tej vaj tse nyob Pas Kis Taas sab hnub tuaj. ACN tshaj tias : cov neeg ntseeg nyob Jaranwala, hauv lub nroog Punjab uas nyob ze Faisalabad, tau khiav tawm coob kawg. Lawv khiav tawm thaum cov fanatic pib txawb pob zeb thiab hlawv tsev. Cov teeb meem no tshwm sim los ntawm kev liam ob tug neeg ntseeg Raja Amir Saleem thiab Rocky Saleem. 

Txiv Plig Abid Tanveer hais rau Aid to the Church in Need (ACN) tias : cov xwm txheej no txaus ntshai kawg.

Cov neeg ntseeg ntshai heev, thov nej thov Ntuj pab peb cov neeg, thov kom lawv lub neej tau kev txuag pov hwm. Coob leej plam lawv tej khaub ncaws hnav thiab txhua yam, lawv tsis paub tias yuav ua li cas thiab yuav khiav mus qhov twg. 

Txiv Plig hais tias : muaj 13 lub tsev teev Ntuj nyob hauv ntau txoj kev ntseeg raug hlawv raug tsoo kom piam, xws li tus xib hwb lub tsev thiab lub tsev teev Ntuj. Muaj 2,000 tawm tus neeg tau khiav tawm hauv lawv tej vaj tse mus lawm.

Ntawv xov xwm tshaj tias : tus Txiv Plig saib lub tsev teev Ntuj Leej Ntshiab Paj Lug nyob hauv lub zos Jaranwala, nws nkaum nyob hauv lub tsev teev Ntuj uas raug cov neeg phem muab vij tas, lawv qw qw tias kom Txiv Plig cia li tawm los. 

Qhov kawg lawv tso tus Txiv Plig khiav mus, tab sis lawv muab tas ib puas tsav yam nyob hauv lub tsev teev Ntuj hlawv pov tseg tas.